Nongpoh, Naitung 31: U MLA ka Jirang Constituency u Bah Sosthenes Sohtun ryngkat ka ophis u Block Development Officer ka Umling C&RD Block mynta ka sngi ki la lum syndon da ka jingialang kaba kyrpang ban ia kren na iatai sani halor ka khuid ka suba ha katei ka thaiñ Byrnihat, kaba dei hadien ba ka sorkar kmie lyngba ka National Clean Air Programme ka la mang haduh T. 1.46 klur ban shna ia ka Solid Waste Management plan kaba dei katkum kane ka juk stad jong ka pyrthei.
Ia kane ka jingialang la pynlong ha Byrnihat, ha kaba la don ryngkat naduh u MLA ka Jirang, u Bah Sosthenes Sohtun, u Block Development Officer ka Umling C&RD Block, u Bah Eric K. Dkhar, u Paiem ka Raid Marwet, u Paiem Ken Syiem, u President ka Synjuk ki Rangbah Shnong Byrrnihat Area u Bah Kendrowel Lapang, ki rangbah shnong, ki seng longkmie, ki samla bad ki riew rangbah katei ka thain.
Ha kane ka jingialang la ai ruh ka jingpynshai da u BDO ka Umling C&RD Block, u Bah Eric K. Dkhar bad u MLA ka Jirang u Bah Sosthenes Sohtun lem bad ka kynhun na Green Tech Foundation ban pynshai halor ka rukom pyntrekam ia katei ka Solid Waste management ka ban nym ktah ia ka mei mariang.
Kane ka Solid Waste Management kin sa shna ha Iew Byrnihat bad ki don haduh 20 tylli ki Shnong kiba lah ban leit bret ia ki jaboh na ki ing ki sem bad ki shnong ki thaw, ba kin sa leh ha kata ka rukom ka ban nym ktah ia ka mariang, da kaba pyniakhlad ia ki plastic, ki nar bad kito kiba pyud khnang ba kan nym buh jingma ia ka mei mariang.
Na ka liang u MLA ka Jirang, u Bah Sosthenes Sohtun nalor ka jinglum jinglang ia ki nongialam shnong bad ki riew rangbah ban ia pynshai halor katei ka Solid Waste Management Plan, ha kane ka sngi u la buh ruh ka jingkyrpad sha baroh ba kin don kata ka jingiatrei lang, khnang ba ka jingdon kane ka jaka theh ñiut kan ai jngmyntoi ia ki paidbah katei ka thain na ka bynta ka khuid ka suba bad khamtam kum u MLA u angnud ban lait noh na kata ka jingsah khein ba ka Byrnihat ka dei kata ka jaka kaba jaboh ha ka ri kumba la pynbna dang shen shaphang ka Byrnihat.
