Nongpoh, Naitung 31: Halor ka jingkyndang naphang ka sorkar Assam ia ki ba wan shong beain ha ka jylla Assam ba bun ki la shah beh noh na katei ka jylla, u MLA ka Jirang Constituency, u Bah Sosthenes Sohun mynta ka sngi u la lum ia ki nongialam shnong bad ha kajuh ka por ban kyrpad ba kin don kata ka jingiatrei lang na ka bynta ban peitngor ba ioh kito kiba shah beh na Assam kin wan poi sha kane ka thain jong ka jylla Meghalaya kaba buh pat ia ka jingma na ka bynta ka lawei jong ka jylla.
Haba ia kren sha ki lad pathai khubor, u Bah Sosthenes Sohtun kum u MLA ka thaiñ, u la ong ba u dap da ka mynsiem ka jingsngewkhia namar bun ki shnong ha Jirang Constituency ki don ha syndah ka jylla Assam bad lada ngim peitngor ka la ban buh jingma ba ki briew kiba sha beh na Assam ki lah ban wan riehtngen ha ka dur jong ki nongbylla ne ban leh jan ia ki nongshong shnong ha syndah ka Assam.
U la ong ruh halor kane ka bynta, kum u MLA u la dep ban kren sha Deputy Commissioner ka Ri Bhoi bad ruh sha u Superintendent of Police ka Ri Bhoi, ba kin long kiba peitngor ba ki briew kiba shah beh na Assam kim dei ban wan poi sha kane ka District Ri Bhoi bad khamtam ki shnong ba don ha syndah ka Assam kiba hap ha ka Jirang Constituency.
Kum u MLA u la kyrpad jur ruh naduh ki Nongialam shnong, ki nongialam Raid bad ki paidbah nongshong shnong ba kin ai ka jingiatrei lang ban long kita kiba peitngor ba ioh don ki riew shim kabu kiba ai jaka riehtngen ne ioh ki wan wad jaka rieh tngen sha ki shnong ha Meghalaya bad lada ki lap ne shem ki dei ba pyntip sha ki bor shnong, sha ki pulit bad ruh sha ka ophis u BDO khnang ban lah ban tehlakam ia kito kiba thmu ban wan sah beain sha kane ka jylal Meghalaya.
Shuh shuh, u la bynrap ruh da kaba ong ba ki dorbar shnong ki don ia ka bor kaba khlain bha ban peitngor ha ki shnong ki thaw bad namar kata kum u MLA u la kyntu ruh naduh ka bor synshar District, ka ophis u BDO bad ki shnong ba kin leit ruh ban jurip ha ki Karkhana ha ka thain Byrnihat ban tehlakam ba ioh don kiba wan shim kabu ban wan ha ka dur ki nongbylla tang ban ioh riehtngen hadien ba ki la shah beh noh na ka jylla Assam, u la bynrap.
