Nongpoh, Nailar 05: Ka Synjuk ki Rangbah Shnong Ri Bhoi Distrct mynta ka sngi ka la shong kyrkieh da ka jingialang ban ia kren halor ar tylli ki mat ba kynthup ia ka jingshah ktah ki paidbah ka Ri Bhoi District na ka jinglip light ba khah khah bad kawei pat ka mat ka dei halor ka jingmih ka Pine Club ha Queen Hotel kaba don ha Jorobat.
Ia kane ka jingialang la pynlong ha Conference Hall ka RBYF ha ka shnong Saiden, kaba dei ha ka jingialam u Chairman u Bah B.B Makdoh bad u Secretary u Bah P.B Sylliang bad la wan shim bynta ruh da ki rangbah Shnong bapher baher jong ki Shnong ba hap ha Ri Bhoi District.
Ha kane ka jingialang kiba bun ki Rangbah Shnong ki la pynpaw halor ki jingeh bad ki ia kynduh halor ka jingshah ktah na ka bording ilektrik ba ki nongshong shnong kim ioh satia ia ka bording ba thikna bad ruh ka jingsniew jong ki Transformer, ki jjngpyndonkam ianki Smart meter bad ki don ruh ki shnong kiba don ha ka jingma ba ki post ilektrik ki la sarang bad jan kyllon ba ka tnad MeECL kam lah ban thung thymmai.
Ha kane ka sngi, ki la ia kren bad ia thir ruh halor ka Pine Club kaba don ha Queen Hotel ba la kynnoh ba ka Synjuk ka dei kawei kaba la lamkhmat ban pyrshah ia ka Casino ha Ri Bhoi, hynrei mynta la mih sa kata ka Pine Club ba la kynnoh ba ka don kita ki Night Club bad ki kam khalai ha kaba ia kane la pynpaw ruh ia ka jingsngewkhia da u MLA ka Jirang.
Haba kren sha ki lad pathai khubor, u General Secretary ka Synjuk,u Bah P.B Sylliang u la ong ba ka synjuk ka la rai ban kynduh ia u myntri ka tnad bording, ban pyrshah ia ka jingpyntreikam ia u Smart Meter ha Ri Bhoi, ban pyntreikam ia ka 132 KV Power Station ha Ri Bhoi bad ruh ban pynbiang thikna ia ka bording ilektrik ha Ri Bhoi, hynrei lada kine ki jingdawa kim urlong urlong ka synjuk ka la rai syndon ba khang tala ia ka ophis u SE ka tnad MeECL kaba don ha Umiam.
Ha kawei ka bynta, ka Synjuk ka la rai ruh ban pyrshah ia ka Pine Clun da kaba kynnoh ba ka don ka Night Club bad ki kam khalai, bad dei ka synjuk kaba la pyrshah ia ka Casino bad mynta la wan poi da kata ka Night Club bad ki kam khalai, hakaba synjuk ka la rai ban ai jingthoh sha u Deputy Commissioner ka Ri Bhoi bad ruh ban leit jurip kynsan ia katei ka Pine Club kaba don ha Queen Hotel, Jorobat.
