Nongpoh, Nailar 5: Tang hadien shi sngi ba ka Ri Bhoi Peoples’ Council (RBPC) ka la pynpaw ia ka jingpyrshah kaba jur ia ka jngplie ia ka Pine Club kaba don ha Queen Hotel ha Jorobat lyngba ki lad pathai khubor bad mynta ka sngi pat kane ka seng ha ka jingialam u President u Samla Jayson Lennox Nongrum, ka la leit ban ia kynduh ia u Deputy Commissioner ka Ri Bhoi, ha ryngkat ka jingpynher ia ka shithi ujor ban dawa tohkit bniah halor ka jingdon ka Night Club bad ki kam Khalai ba pyniaid ha Queen Hotel, Jorobat lyngba ka Pine Club.
Haba kren sha ki lad pathai khubor, u President ka RBPC, u Samla Jayson Lennox Nongrum, u la ong ba ka seng ka pyrshah jur ia ka jingplie ia ka Pine Club ka don ha Queen Hotel ha Jorobat ba hap ha u pud u sam ka Shnong Mawsmai bad kum ka seng ka la mih ban pyrshah jur ruh ka dei halor ka nongrim ba ki don ki kam khalai beain bad ka Night Club ba kum ka seng kam lah ban pdiang ban don kitei ki kam beain.
U la ong ruh ba ka seng ka la dawa na u Deputy Commissioner ba un pynlong ia ka jingtohkit kaba bniah lyngba ka bor District bad ka jingtohkit ruh ka dei ban long kaba khuid kaba suba.
U la iathuh ruh kumba la pynpaw da u Deputy Commissioner sha ka seng, na ka liang ka bor synshar district ka la dep ban phah tohkit halor ka jingkynnoh ba ka don ka night club bad ki kam khalai ha katei ka Queen Hotel bad ka jingtohkit mynta ka dang iaid shakhmat ha kana ka seng ka dang mynta ia ka kaiphod kaba mih na katei ka jingphah tohkit, u la ong.
Shuh shuh, ka seng ka dawa ruh ba dei ban tohkit da kaba khuid kaba suba halor kitei ki kam beain bad ha kajuh ka por ka Dorbar Shnong Mawsmai ruh ka dei ban pynshai sha ki paidbah halor kano ka nongrim ba la ai NOC sha ka Pine Club. la ka dei tang ka jaka ban pynlut por ha ki sngi kut taiew ne ka dei ka jaka ba don kata ka Night Club bad ki kam khalai beain ba kum ka seng ka pyrshah jur ia ki kam beain, u la bynrap.
