Shillong, Nailar 05: Ka Sorkar Jylla hynne ka sngi kala sam iaki song pisa shaki nongdie jingdie madan na Khyndai Lad kiba la kynriah shaki 2 tylli ki jaka bala ithuh daka Sorkar.
Iaki song pisa ba la mang sha ki nongdie jingdie madan la sam da u Symbud Myntri Rangbah ka Jylla ba khmih iaka tnat Urban Affairs u Bah Sniawbhalang Dhar bad u Myntri ka tnat Tourism u Bah Paul Lyngdoh haka jingdonlang ki ophisar ka tnat Shillong Municipal Board bad Urban Affairs.
Ha kane ka sngi ka Sorkar kala mar T.10 hajar sha baroh ki nongdie jingdie madan kaba dei ka bai lutksan haba ki kynriah iala ki mar shaki jaka
Hadien bala ioh iaka song pisa ba T.10 hajar, ka Sorkar kan sa pyllait ruh mar T.2 hajar man u bnai naka bynta 5 bnai sha man ki nongdie jingdie madan kum ka dak ban kyrshan iaki katba ki dang sdang iaka kam khaii haki jaka thymmai.
Haba kren ha kane ka sngi u Bah Sniawbhalang ula ong ba kane ka sngi ka pynkynmaw iaka jingjop jong baroh ki nongdie jingdie madan kiba la sngewthuh iaka jingdonkam ban pynthikna baki surok bad ki lynti iaid kjat ha nongbah Shillong kin shngain.
U Bah Sniawbhalang ula iathuh ruh baka jingpyntrei iaki 15 tylli ki jaka leit shabar (Toilet) bad ban pynbiang bording ruh ki dang iaid ban pynthikna ba baroh ki jingdonkam haki jaka thymmai ki long kiba biang lut.
