Hadien Ba Bthei Kynsan Ka Shaka, Kylla Lyndang Ka Trok Tanker Ha Ka Surokbah NH-6 Ha Ri Bhoi
Nongpoh, Nailar 05: Tang na ka daw ka jingbthei jong kawei ka shaka na ki bynta ba shadien bad ruh ha ka jingkham pynher sted ia ka kali, kawei ka Trok Tanker ka la kylla khongpong ha ka surokbah na ka daw ba u Dribar um shym la lah shuh ban tehlakam na ka jingbthei kynsan ka Shaka jong katei ka Trok Tanker.
Kane ka jingjia ka la jia mynta ka janmiet ha ka por 3 baje ei ei janmiet ha ka surokbah National Highway-6 ba hap ha ki bynta jong ka Shnong Quinnine ha Ri Bhoi. Katei ka Trok Tanker kaba la kylla ka dei kaba don ia u number AS-01-GC-7554 bad kaba la niah da u Ripul Basumataru na ka shnong Bagudamry na ka Goalpara District jong ka jylla Assam.
Kumba la ioh lum jingtip, ha kane ka jingjia, ym shym la don satia ba la mynsaw bad lait noh katei ka jingkylla khongpong katei ka Trok Tanker ha katei ka surokbah ban kiew na Guwahati sha Shillong.
La iathuh ruh ba kane ka Trok Tanker ka dang wan na Assam da ka jingthmu ban leit sha Silchar, hynrei kane ka Trok ka la kylla noh ha katei ka jaka tang na ka daw ka jingbthei kynsan ka Shaka ba shadien katei ka Trok.
Na ka liang ki pulit ki la poi mardor sha kane ka jaka bad hadien ka jingtohkit ki la tan noh ia katei ka Trok sha Nongpoh Police Station bad ka jingtohkit halor kane ka jingjia ka dang iaid shakhmat.
