Shillong, Jylliew 13:
Da ka jingsngewsarong halor ka jinglah jong ki samla pule ban pass bha ha ka eksamin Secondary School Leaving Certificate (SSLC) kaba dang shu pynbna ha kine ki khyndiat taiew ba lah dep, ka skul Hill Crest Higher Secondary School, Rynjah ha ka 10 tarik jong u bnai Jylliew, 2024 ka la pynkup burom ia lai ngut ki khynnah skul bad lai ngut ki nonghikai da ka khusnam kaba la ai kyrteng ‘Dr. Lurstep Laurie Cunville Memorial Achievement Award’.
Ki lai ngut ki khynnah pule kiba la shah pynkup burom ha kane ka sngi ki kynthup ia ka Uma Rani Noarm, kaba la ioh ia ka kyrdan kaba 16, ka Y Sonali Devi kaba la ioh ia ka kyrdan kaba 18 bad ka Eshratara Begum kaba la ioh ka kyrdan ba 20 ha ka resol SSLC kaba dang shu dep pynbna ha kine ki khyndiat taiew ba lah dep.
Nalor kitei ki khynnah skul, na ka liang ki bor pyniaid skul, ki la ioh ruh ban pynkup burom ia lai ngut ki nonghikai ba kynthup ia ka Kong Gracia Lyngdoh Tron, ka nonghikai ia ki sobjek Health Education, Chemistry bad Science, u BB Shaw, ba hikai ia ka sobjek jingkhein lane Mathematics bad ia ka Papori Bordaloi kaba dei ka Vice Principal, halor ka jinglenlade bad shimkhia ka jongki ban kyntiew ia ka pule puthi hapoh kane ka skul kaba la kiew irat bad nang paw kat nang mih ki sngi ki por lyngba ka jingmih jong ki khynnah kiba wan ha ki kyrdan ba hakhmat.
Ha kane ka sngi la wan ban iadon ryngkat da u Bah Mc Donald Marbaniang, Joint Director jong ka Meghalaya Board of School Education (MBoSE), u Bah Eddie War, Rangbah shnong ka Rynjah, u Bah AL Monte Pariat, Principal ka skul, ka Kong EC Pariat, Adviser jong ka skul lem bad kiwei kiwei de.
