Shillong, Jylliew 15:
Ka sorkar jylla lyngba ka hukum kaba la pynmih da ka tnad kam pohïng jong ka sorkar jylla, mynta ka sngi, ka 14 tarik jong u bnai Jylliew ka la pynmih ia ka hukum ban kynriah kam ia shibun ngut ki ophisar pulit ka jylla ba kynthup ruh ia u Superintendent of Police ka East Khasi Hills, u Rituraj Ravi uba la shah kynthoh jur hadien ka jingthmu pynkynriah jubor ia ka Kong Bindas Syiem ha ka shiteng miet miet jong ka 9 tarik u Jylliew, 2024 katba ka dang shong shah thngan ha ka ka jaka pynieng kali jong ka Additional Secretariat ha nongbah Shillong.
Ha katei ka hukum kaba la soi da u Cyril V. Diengdoh, Secretary jong ka sorkar jylla sha ka tnad kam pohïng kaba la tip ruh kum ka Home (Police) Department, ia u Superintendent of Police jong ka East Khasi Hills, u Rituraj Ravi la pynkynriah noh kum u Commandant jong ka 6th MLP Battalion ha Umran, bad ha ka jaka jong u, yn wan ban shimti pat da u Bah Silvester Nongtnger kum u Superintendent of Police ka East Khasi Hills uba bat mynta kum u Commandant jong ka 6th MLP Battalion ha Umran.
Kiwei pat ki heh ophisar pulit kiba la shah pynkynriah kam lang lyngba katei ka hukum kaba la pynmih mynta ka sngi, ki kynthu ia u Mukesh Kumar Singh uba bat mynta, kum u Inspector General (Law & Order), Shillong, ban leit ban shimti pat kum u Inspector General of Police-Commandant General jong ka Civil Defence & Home Guards, Shillong.
U JFK Marak, Inspector General of Prison, Shillong un leit ban shimti kum u Commandant ka 2nd MLP Battalion, West Garo Hills bad ia u Bah Banshanborlang J. Laloo uba bat mynta ia katei ka kam la pynkynriah kam noh ban leit ban shimti pat kum u Commandant ba thymmai jong ka SF-10, ha ka nongbah Shillong.
Nalor kitei ki heh ophisar pulit, kiwei de kiba la shah pynkynriah kam mynta ka sngi, ki kynthup ia u Bah Herbert G Lyngdoh, uba bat mynta ia ka kam Superintendent of Police ka Anti-Infiltration Directorate, Shillong ban leit shimti noh kum u Commandant ka 1st MLP Battalion, Mawiong. Ka Mary GT Sangma kaba bat mynta kum ka Principal jong ka Police Training School, Umran ka ban leit ban shimti noh kum ka Superintendent of Police ka Anti-Infiltration Directorate, Shillong. U Bah Vivek Syiem uba bat mynta kum u Superintendent of Police ka tnad CID la pynkynriah noh ban long kum u Inspector General (Law & Order), Shillong. U Bah Lakador Syiem uba bat mynta kum u Commandant ka 4th Battalion, Sohpian la pynkynriah kam noh ban leit shimti pat kum u Principal jong ka Police Training School, Umran.
U Dr. Dara Aswaghosh uba bat mynta kum u Superintendent of Police ka West Garo Hills, Tura la pynkynriah kam noh ban leit shimti kum u Superintendent of Police ka Shillong (City), u Pankaj Kumar Rasgania uba bat mynta ia katei ka kam Superintendent of Police ka Shillong (City), la pynkynriah kam noh ban leit shimti pat kum u Superintendent of Police (Sadar) jong ka nongbah Shillong. Ia u Pawar Swapnil Vasantrao, uba bat mynta kum u Commandant ka 1st MLP Battalion, Mawiong, la pynynriah kam noh ban leit shimti kum u Superintendent of Police ka North Garo Hills, Resubelpara.
Ia u Abraham T. Sangma, uba bat mynta kum u Superintendent of Police ka North Garo Hills, Resubelpara la pynkynriah kam noh ban leit shimti pat kum u Superintendent ba thymmai jong ka West Garo Hills, Tura, katba ia u Ringrang TG Momin, uba bat mynta kum u Superintendent of Police ka Fire and Emergency Services (F&ES) ka nongbah Tura la pynkynriah kam noh ba un leit shimti pat kum u Superintendent of Police ka tnad CID ha nongbah Shillong.
Ia u Bruno A Sangma, uba bat mynta kum u Commandant jong ka SF-10 la pynkynriah kam noh ban leit shimti pat kum u Superintendent of Police ka Fire and Emergency Services (F&ES) ka nongbah Tura, bad ia u Rupam R Marak, uba bat mynta kum u Superintendent of Police (Security) ka nongbah Shillong, la bthah ba un leit ban shimti noh kum u Commandant ka 4th Battalion, Sohpian. U N. Subhash Singh uba bat mynta kum u Assistant Inspector General (Law & Order), Shillong, la pynkynriah kam noh ban leit shimti kum u Superintendent of Police (R/PR) ka nongbah Shillong, katba ia u Bah Losterwell Nongpluh, uba bat mynta ia kam Superintendent of Police, SB-II, Shillong la pynkynriah kam noh ban leit shimti kum u Superintendent of Police (Security) ba thymmai jong ka nongbah Shillong.
Ia u Feroz Rehaman uba bat mynta kum u Deputy Commandant ka 5th MLP Battalion, Samanda, East Garo Hills Hills la pynkynriah kam noh ban leit shimti kum u Superintendent of Police (Traffic) ka sor Tura. Ia u Torid D Sangma, uba bat mynta kum u Additional Superintendent of Police ka South West Garo Hills, Ampati, la ailad ba un dang bat shipor ia kane ka kam bad la pynkynriah ruh ia u ban long pat kum u Assistant Inspector General of Police (E) ba thymmai jongka nongbah Shillong.
Ia u Bah Marlon SH Nonghuloo, uba bat mynta kum u Deputy Commandant ka 3rd MLP Battalion, Khliehtyrshi la ailad ba un dang bat shipor ia kane ka kam bad la pynkynriah ruh ia u ban long pat kum u kum u Superintendent of Police, SB-II, Shillong bad ia u Stanislaus A Marak uba bat mynta kum u Additional Superintendent of Police ka Resubelpara, la ailad ba un dang bat shipor ia kane ka kam bad la pynkynriah ruh ia u ban shimti pat kum u Superintendent of Police (Eastern Range) jong ka nongbah Shillong.
