Nongpoh, Nailar 09: Na ka jingsngewkhia kaba jur hadien ba la ioh jingujor halor ka jingdon jong ki katto katne ki dukan die marbam kum ki dukan ja, ki dhaba bad kiba die jingbam kiba khlem buh thik ia ki kyndon katkum ka Food And Safety, mynta ka sngi ka kynhun sengbhalang jong ka Ri Bhoi YOud Developmental and Social Organization (RBYDSO) bad ka Meghalaya People Social Organization (MPSO) hadien ba la ioh jingbit na ka tnad Food and Safety bad na ki bor pulit ka Ri Bhoi ka la pynlong da ka jingleit jurip ia kitei ki dukan ha ka thaiñ Sor Nongpoh bad ki Shnong ba marjan harud ka surok bah National Highway 06.
Ha kane ka jingjurip ia ki dukan die marbam bad dukan bam, la lap shisha ia ki katto tylli ki dukan kiba pynkhein ia ki kyndon ain katkum ka food and safety kaba buh jingma ia ki paidbah nongbam ia kine ki marbam, la lap ba don ruh ki jingdie marbam kiba la die ia ki bar bam ba la kut tarik (expired) bad kiwei kiwei ki bym long shngain ban bam da ki riew paidbah.
Haba kren sha ki lad pathai khubor, u Genral Secretary ka RBYDSO u Bah Kerbok Malai, u la ong ba ka daw kaba la pynlong ia ka seng ban pynlong ia kane ka jingkhynra ia ki dukan marbam ha sor Nongpoh, ka dei namar ba ka seng ka sngewkhia ba bun ki dukan ki khlem bud kyndon ban die ia ki mar bam kiba sngain ia ka koit ka khiah bad ruh wat ki dukan ba die ja ne marbam kim lah ban leh khuid ne iaid katkum ki kyndon ban shngain ki paidbah nongbam.
U la ong ruh la leh ia kane ka kam ban khynra ne jurip ia ki dukan hapoh ka sor Nongpoh, ka dei ruh hadien ba ka seng ka la ioh jingujor na kiba bun ki paidbah nongbam bad ba ki kyntu ba dei ban pynlong ia ka jingjurip khnang ban lap shisha la ki dukan ki bud neem katkum ki kyndon bad kaba kham sngewkhia la lap ruh ba bun ki dukan ki la pynkhein ia ki kyndon khlem da bud ia ki kyndon khamtam ban ioh ia kata ka Food License bad ban lehkhuid ha ki jaka bam bad ki jaka shet.
Kumba la lap ba don bun ki dukan kiba la pynkhein kyndon khlem da bud thik ia ki kyndon ain, na ka liang ka RBYDSO bad ka MPSO ki la ujor syndon ha Nongpoh Police Station bad ruh sha ki bor ba dei peit jong ka Food and Safety na bynta ban leh pat ia kaba donkam katkum ki kyndon jong ka ain, u la bynrap.
