Nongpoh, Nailar 08: Ban ai burom ia uwei na u nongialam uba la ai ka jingshakri shibun ha ka imlang ka sahlang bad halor ki kam kiba bha kiba u la leh na ka bynta ka dong bad ka thain, ka ka Mawdem Academic School Organization ha ka sien kaba nyngkong ka la pynlong da ka ‘1st Liar Sirdar Mawdem Marathon’ ha ka shnong Mawdem kum ka jingai burom ia une u rangbah ba la tip paidbah u Liar Sirdar.
La wan ban plie ia kane ka 1st Liar Sirdar Mawdem da u President ka HNYF Northern Region, u Bah Hesting Lyngdoh bad la pynhap pyrda pat da u MLA ka Jirang u Bah Sosthenes Sohtun ha ryngkat ka jingdon lang u Vice President ka HNYF Sengkmie u Bah Barna Manih, ki nongialam shnong bad ki paidbah nongshong shnong ka thain Mawdem.
Haba pynlong ia kane ka jingiamareh marathon, nalor ka jingai burom ia u Liar Sirdar kum u nongialam jong ka imlang ka sahlang bad u nongialam niam, la buh ruh halor ka phang ‘Run For Health, Run for Victory) kaba long ruh ban ai jinghikai ia ki paidbah ba ki kam sport ki dei kiba iarap ruh ban ai ia ka jingkoit jingkhiah bad ruh haba shaid ba khlain ngin lah ban jop ha shibun ki kam kum ka thong ka jingim briew.
Ha kane ka sngi la sam ruh ia ki khusnam sha ki nongjop babapher naduh kiba la heh ka rta, kiba khynnah tam bad ruh ki samla kynthei bad shynrang ba la sam da u MLA bad kitei ki nongialam ka HNYF bad ki nongialam Shnong katei ka thai.
