Shillong, Nailar 12: U Myntri Rangbah ka Jylla u leit sha Iewduh ban sngap iaka jingeh ki nongshong iew bad ban ai ia ki skhim ban iarap iaki ym kum kiwei ki Nongialam kiba leit sha iew tang ban pan Vote.
Ia kane la ong da u Symbud Myntri Rangbah ka Jylla u Bah Sniawbhalang Dhar haba kren haka jingialang sam jingiarap shaki nong shong die jingdie madan kiba shong hapoh Iewduh.
Haba kren ha kane ka sngi u Bah Sniawbhalang ula pynkynmaw ba dang shen u Myntri Rangbah ula wan sha Iewduh wat hapdeng ka jungther u lapbah ban sngap iaki jingeh ba ki nong shong iew ki kynduh.
“Hadien ka jingwan u Myntri Rangbah ka Jylla u Conrad K Sangma ha Iewduh kila mih ki jingkynthoh hynrei u Myntri Rangbah um sngap bad mynta hi ula pyllait iaka song pisa haka wat bar ar (Second Phase) ban pynitynnad bad pynbha iaka Iewduh” la ong u Bah Sniawbhalang.
U Bah Sniawbhalang ula ong baka Sorkar MDA kam ju kren than kum kiwei ki nongialam hynrei ka leh beit daka kam ban iarap iala ki paidbah ka Jylla.
