Shillong, Nailar 14: Kumba ka Iewduh ka dei kawei na ka iew kaba la bna nam bha ha ka jylla bad ha ka ri hi baroh kawei bad ba ka dei ka iew kaba la rim tam ha ka jylla bad ka long pat ka jingioh mynsiem ia ki nongshong dukan ha katei ka iewduh ba u Myntri rangbah ka sorkar jylla, u Conrad K. Sangma mynta ka sngi u la leit ban plie ia u Mawnongrim na ka bynta ban sdang ban tei ia ki kam pynroi ha katei ka Iewbah jong ka jylla.
Kane ka jingplie ia u mawnongrim ka dei hadien ba ka sorkar ka la wan rah ia ki kam pynroi lyngba ka tnad Urban Affairs bad ka Shillong Municipal Board na ka bynta ka projek ba la tip kum ka ‘Improvement of Infrastructure and Pubic Amenities in Iewduh’ ha kaba la mang tyngka lyngba ka NEC.
Haba plie ia une u mawnongrim, nalor u myntri rangbah u Conrad K. Sangma, la don ryngkat ruh u Symbut Myntri ka sorkar jylla, u Bah Prestone Tynsong bad u Bah Sniawbhalang Dhar, ka Myntri ka tnad ka koit ka khiah, ka Dr. Ampareen Lyngdoh, ki MLA bad ryngkat u Syiem ka Hima Mylliem bad ki myntri ka Hima nalor ki ophisar bad ki paid nongshong iew ha katei ka Iewduh.
Ha kane ka sngi, kitei ki heh ki hain ka sorkar ym tang ba ki la wan ban jurip ia katei ka iew bad ban plie ia utei u mawnongrim jong ki kam pynroi ban pynbit pynbiang ia katei ka iew ban suk ki nongshong iew bad ki paidbah ba leit iew leit hat, hynrei ha kane ka sngi ka sorkar ka la sam ruh ia ki skhim ai jingmyntoi na ka bynta ki nongshong dukan hapoh katei ka iew.
