Nongpoh, Nailar 22: Ki dkhot ka Hynniew Trep National Youth Front (HNYF) Nongpoh Circle hapoh ka jingialam u Bah Donroi Kshiar kum u Chief Adviser ka Seng ki la leit ban jurip ïaka jaka ba thmu ban shna ia ka 132 KV Power Station kaba don ha ka Shnong Umlyngkdait, Nongpoh.
Ha katei ka jingleit jurip la ïadonlang ruh da u SDO ka tnad Sam Bording Nongpoh kem dkhot ka HNYF Nongpoh Circle kiba kynthup ia u samla Birbor Khongbeh Secretary, Ronald Tangsang Finance Secretary, u Banker Warbah Sport Secretary.
Haba kren sha ki lad pathai khubor, naka liang u Bah Donroi Kshiar u la ïathuh ba kane ka jingduh lording ielktrik kaba khah khah ha ka sor Nongpoh ka la dei kawei naki mat ba ka Seng ka la ju ïaleh ne iakhun naduh ki snem kiba mynshwa bad ba ka Seng ka la ju leit ruh ban kynduh iaki Myntri bad ki Ophisar bapher bapher na ka bynta ban pynbiang thikna ia ka bording ilektrik hapoh ka thain Nongpoh.
Shuh shuh, u la ong ruh, kane ka jingsdang ban pyntrei iaka 132 KV Power Station ha Nongpoh ka la long ka jingkyrmen kaba khraw naka bynta ki paidbah ban ioh ia ka bording kaba thikna bad ha kajuh kapor u la kyntu ruh ïaki bor ba dei peit ba ba kin pynsted noh ia ka kam khnang ba lada lah ban pyndep noh ia katei ka 132 KV Power Station kan weng noh ia ka jingshah ktah ki paidbah na ka jinglip bording kaba khah khah kaba ki la mad baroh shi katta.
