Nongpoh, Nailar 25: Ka kynhun nonglute bad kiba la tap ia ka dur khmat ha ka step jong ka sngi u Blei kata ha ka por 2 baje ei ei mynstep ki la leit rung da ka bor bad lute ia ka ophis treikam jong uwei u heh spah uba ju shalan Mawit kaba don ha ka 13mer, Jorobat bad ha kane ka jingleit lute k la ioh rong bun ia ka pisa bad kynthup ki jingdeng ksiar ba remdor ba la kot da ki lak tyngka.
Une u heh spah ba la ngat ha katei ka apot shah lute la tip kryteng kum u Dedpak Hazarka uba shong basah ha 13mer, Jorbat, Assam.
Kumba la iathuh da u Manager bad ki nongap pahara, la ong ba kitei ki runar kiba la tap dur khmat bad kiba la pynap da ki Pistol ki la rung nynkong ha ka ophis treikam ha kaba ki la teh da u tyllai ia u manager bad ia ki nongap paraha ha ryngkat ka jingbom jingshoh bad hadien kata ki la leit rung sa ha ka ïingsah ba ki la kyndang ia ki Almari bad ka jaka ba buh ia ki jingdeng ksiar ba ki sa rong tuh ia ka pisa bad kitei ki jingdeng ksiar.
Ha kane ka jingjia, ka la pynher mynsiem ruh ia baroh kiba haïing hasem utei u heh spah bad kitei ki runar hadien ba ki la dep ban lute ki la phet noh na katei ka jaka.
Halor kane ka jingjia, ki Pulit na Jorobat bad na Sonapur ki la wan poi mardor sha katei ka jaka ban pynlong ia ka jingtohkit bad la dep ruh ban register case pyrshah ia kitei ki runar. Kumba long haduh mynta ki pulit kim pat lap ksai bad kim pat ioh kem satia ia kitei ki nonglute kiba la leh ia katei ka kam ban pyntieng pynsyier da ki pistol bad ki tiar ialeh ha ryngkat ka jingkah durkhamt ha katei ka kam lute kaba ki la lute na katei ka ing.
