Nongpoh, Nailar 25: Da ka jingtuklar u MLA ka Mawhati u Bah Charles Marngar bad ruh ryngkat ka jingiatrei lang ki bor pyniaid skul, kan sa long ka jingkyrkhu ia ka Mawhati Rural Community Secondary School, kaba dei ka SSA School, ba shen kan sa ioh da ka ïingskul kaba paka ban shana ha ka jaka jongka kaba la don ka jigneh kumba 1 kar bad kaba dei lyngba ka jingmang kyrpang na ka Chief Minister Special Fund ha ka jinglut kaba kot sha ka T. 8 lak tam.
Kum ban pynkynmaw, kane ka skul la seng ha u snem 2006 ha ka jingpeit jingkhmih ka Umsohlait Parish bad dei ha u snem 2016 Ba ka Parish ka la aiti noh sha ka Shnong ban pyniaid ia kane ka skul.
Namar ka jingbym don ka skul kaba paka bad ki kamra klas ia ki khynnah skul ba la hap ban pynlong Klas ha ki Gallery ka madan ialehkai ba la ai sngewbha da ka Shnong bad ka Sport Club, u MLA ka Mawhati u Bah Charles Marngar ryngkat ki bor pyniaid skul ki la pynsngew sha ka shkor u Myntri Rangbah ka jylla, u Conrad K. Sangma bad ka long pat ka jingkyrkhu ba u Myntri Rangbah u la pynshah ia ki shkor da kaba u la mang haduh T. 8 lak tam ban shna da ka ïingskul kaba paka.
Na ka liang u Bah Charles Marngar kum u MLA dang shen ruh u la wan ruh ban jurip ia kane ka skul, ha kaba da lade u lap ia shibun ki jingduna ha kaba wat katei ka skul ka la poi sha ka kyrdan Secondary, hynrei kam don pat ia ki kamra klas ne ka ïing skul kaba biang na ka bynta ki khynanh skul. Ha kane ka sngi na ka liang u MLA u Bah Charles Marngar u la iarap ruh da ka song pisa kaba T. 1 lak ban iarp na ka bynta ban siew ia ka tulop bas hi snem jong ki nonghikai.
