Nongpoh, Nailar 28: Kawei ka Trok Container kaba don ia u number HR-55-AC-5521 ka la kylla syndon ha ka surokbah National Highway- hajan ka Umling Forest, kaba dei hadine ba u Dribar ym lah shuh ban tehlakam ia ka Kali na ka jingbym treikam u Brake.
Kane ka jingjia ka la jia hynnin ka miet ha ka por 11.15 ba katei ka Trok Container ba Kit ia ki Siej ka dang wan na Umran ban leit sha Guwahati bad ha kane ka jingjia u Dribar bad u Nongbud ki la mynsaw malu mala bad la rah noh sha Civil Hospital Nongpoh bad Bethany Hospital ban shah sumar.
Ia kane ka Trok Container la niah da u Noren Malik na Mordabad UP bad ryngkat ka jingdon lang u nongbud ba la tip kyrteng kum u Shri Malik Kaif kiba dei lang najuh ka shnong.
Kumba la pyntip ruh da ki Pulit, ka daw ka jingkylla kane ka Trok Container ka dei hi da ka jingbym treikam u Brake ba u dribar um lah shuh ban tehlakam ia ka Kali ba kit ia ki Siej bad na ka liang ki Pulit ruh ki la pynlong ia ka jingtohkit bad la leh katkum ki kyndon jong ka ain.
