Nongpoh, Nailar 30: Da ka jingiatrei lang u MLA ka Jirang Constituency u Bah Sosthenes Sohtun, ka NPP Jiang Block mynta ka sngi ka la pynlong da ka jingpynkup burom ia ki Samla ba pas bha ha ka SSLC examination na ka byna kito ki samla ba hap ha ka Umling C&RD Block. Ha kane ka sngi la pynkup burom ruh ia baroh ki Prinicipal jong ki skul, kaba dei ka jingpynshlur halor ka jingpass bha ki khynnah skul.
Ia kane ka jingpynkupburom la pynlong ha Parish Hall ka St. Francis Asisi, Byrnihat Parish, ha kaba u Rupert Momon, Chairman ka Meghalaya New and Renewable Energy Development Agency bad u MLA ka Kharkutta u la wan ban shim bynta kum u kongsan bad u Bah Savio Blah, District School Education Officer ka Ri Bhoi kum u symbut kongsan.
La sakhi lang ruh ha kane ka sngi da ka jingdon lang u Bah Sosthenes Sohtun kum u MLA bad MDC ka Jirang ha ryng ka jingshim bynta kitei ki samla pule, ki kmie ki kpa, ki nonghikai, ki Principal bad kiwei kiwei ki riew rangbah.
Na ka liang ka NPP Jirang Block, nalor ba la pynkup burom ia ki samla pule kiba pass bha ha ka SSLC bad ruh ia ki Principal, ha kane ka sngi ka la pynkup burom ruh ia ka Kong Wanmontimai Marbaniang kaba dei ka President ba thymmai jongka NPWF Ri Bhoi District.
Haba kren ha katei ka sngi kum u kongsan, u Rupert Momin u la ai khublei kyrpang ia u MLA bad ruh ia ka NPP Jirang block, kaba la shim ia kane ka bynta ban pynkup burom ia kitei ki samla kiba pass bha ha ka SSLC examination bad kane ka jingpykup burom kam dei satia tang ban pynshlur ia ki ba kin dang pule sha ki kyrdan kiba shaneng bad ka ai mynsiem ruh ia kiwei ki khun samla ha ka pateng ban sa wan ba kin ioh mynsiem ban leh bha ha ka jingpule.
Na ka liang u MLA ka Jirang u Bah Sosthenes Sohtuh ruh haba kren ha kane ka sngi u dap da ka mynsiem ka jingkmen ba la mih ki samla kiba la kham pynleit jingmut ha ki jingpule bad kane ka jingpynkup burom ka long ban ai mynsiem bad ban pynshlur ba kin dang leh bha ha ki jingpule khnang ban mih kita ki samla kiba shakri ruh ia ka imalng ka sahlang lada ki la poi ha ki kyrdan bapher bapher jong ka kam shakri.
Shuh shuh, u la ong ruh ba u khmih lynti ba kin don ki samla ki ban rung ha ka thup jong ka top twenty bad lada don kum kine ki samla kiba rung ha katei ka thup, u la kular ruh ban ai ruh da ka khusnam kaba kham kyrpang bad kane ka long ka dak ka jingpynshlur ia ki samla pule ba kin don kata ka thong ha ki jingpule jongki, u la bynrap.
