Nongpoh, Nailur 16: Ka jingai bhah u Myntri rangbah ka jylla u Conrad K. Sangma ia u Bah Sosthenes Sohtun ban rung ha ka kynhun myntri sorkar kum u MLA na Jirang Constiteuncy ka Ri Bhoi District, ka la long shisha ka jingkmen kyrpang eh ia ki paidbah ka Jirang Constituency bad ia ki paidbah ka Ri Bhoi District, namar baroh shi katta wat la ka NPP ka don 2 ngut ki MLA na Ri Bhoi hynrei kim shym la ioh bat ia ka kyrdan myntri sorkar lait noh ha ka por ba dang long MLA u Bah Dasakhiat Lamare na Mawhati uba la ioh bat ia ka kam myntri ban peit ia ka tnad Fisheries.
Kum ban pynkynmaw, ka NPP party mynta ka la don haduh 4 ngut ki MLA na Ri Bhoi District, kata hadien ba ki 2 ngut ki MLA ka Congress u Dr. Celestine Lyngdoh bad u MLA ka Mawhati u Bah Charles Marngar ki la wan rung sha ka NPP Party bad ki 2 ngut pat ki MLA ba la jop na ka NPP ki kynthup ia u Bah Damanbait Lamare na Umroi Constituency bad u Bah Sosthenes Sohtun na Jirang Constituency, uba la ioh rung ruh ha ka kynhun Myntri sorkar kum u MLA uba mihkhmat ia ka Jirang Constituency na Ri Bhoi District.
Kane ka jingioh bhah lane shah jied u Bah Sosthenes Sohtun kum u myntri sorkar, ka la long shisha ka jingai mynsiem ia ki paidbah ka Ri Bhoi, ha kaba la bun snem mynta ym shym la don ba ioh bat myntri sorkar na Ri Bhoi bad dei ha kane ka kynti ha ka sorkar MDA II, ba hadien ba u Myntri sorkar u la pynhiar shuki haduh 8 ngut ki Myntri sorkar u Bah Sosthenes Sohtun kum u MLA ka Jirang u la shah jied ban long myntri kaba long shisha ka jingkmen na ka bynta ki paidbah ka Ri Bhoi District.
Kum ban pynpaw, hadien ka jingpynhiar shuki u myntri rangbah ka jylla haduh 8 ngut ki myntri sorkar bad ban pynbam smai mynta ka sngi ia ki Myntri sorkar ba thymmai da u Lat ka jylla ha Raj Bhavan, kane ka la pynkmen shi katdei ei ia ki paidbah ka Ri Bhoi bad bun ruh ki riew paidbah ki la pynpaw ia ka jingkmen halor ka jingjied u Mynti rangbah ka jylla ia u Bah Sosthenes Sohtun ban long kum uwei u Myntri sorkar ba mih khmat na Ri Bhoi District.
Kynthup lang, ki Myntri sorkar kiba shah pynhiar shuki ki kynthup ia ka Dr. Ampareen Lyngdoh myntri ka tnad ka koit ka khiah, u Abu Taher Mondal, myntri ba dei peit ia ka tnad bording, u Rakkam A. Sangma myntri ka tnad pule puthi bad u Bah Comingone Ymbon myntri ka tnad Food And Civil Supply, kiba dei ki MLA ka NPP. Kiba ioh rung bujli pat ha ka jaka jong kine ki 4 ngut ki kynthup ia u Bah Sosthes Sohtun MLA ka Jirang, u Timothy D. Shira MLA ka Resulbelpara, u Bah Wailadmiki Shylla MLA ka Jowai bad u MLA ka Dalu u Brening A. Sangma.
Kiwei pat ki myntri sorkar kiba hap hiar shuki na ka party UDP bad kiba ia trei lang bad kane ka sorkar MDA II ki kynthup ia u Bah Paul Lyngdoh myntri ba dei peit ia ka tnad Tourism, u Bah Kyrmen Shylla Myntri ka tnad Revenues and Disaster Management bad kiba mih bujli ha ka jaka jong ki kynthup ia Bah Metbah Lyngdoh, uba dei ruh u President ka UDP bad u Bah Lahkmen Rymbui uba dei u MLA ka Amalarem Constituency.
Na ka liang ka party BJP u Bah A.L Hek myntri ka tnad Animal Husbandry and Veterinary yn mih bujli da u Bah Sanbor Shullai MLA ka BJP na South Shillong Constituency bad na ka liang ka HSPDP pat un hiar shuki u Bah Shakliar Warjri myntri ka tnad kam sport bad ban mih bujli da u MLA ka Mawshynrut u Bah Methodius Dkhar.
