Nongpoh, Nailur 16: Kawei ka riew kynthei da ka ummat jingkmen mynta ka sngi kala ioh pdiang da kawei ka iing ba paka bad kaba thymmai ïakaba la tei bad shna da ka All Primary School Teachers Association lyngba ki nonghikai na kylleng ka ri Khasi bad Jaiñtia kaba dei ruh ka jingrakhe ïaka jingdap 176 snem ka lyngkhuh sngi iap jong u Rev (L) Thomas Jones u ba la ju tip ruh kum u kpa jong ka thoh ka tar bad kumjuh ruh ka jingdap 183 snem jong ka jingdon ki skul Lower Primary haka ri Khasi bad Jaiñtia.
Katei ka riew kynthei ka dei ka kong Elbina Marbañiang naka shnong Umsaitsning ha Ri-Bhoi District kaba don ruh 4 ngut ki khun kiba la im hapdeng ka jingshem pap hadien ba kim don shuh u kpa u ba peit bad khmih ïaka iing ka sem.
Ïa katei ka iing la aiti mynta ka sngi sha ka Kong Elbina Marbañiang bad la leit ban ot ribbon da u Bah FC Shullai General Secretary ka APSTA, haka jingdonlang u Babu Tonyfort War President, Babu DD Kharlyngdoh Vice President, ki nongïalam shnong, ki pastor bad kiwei kiwei.
Shuh shuh ïa katei ka iing la tei haka jinglut kaba la poi kumba 6 lakh duna ryngkat ki tiar ki tar bad ki jingdonkam ha iing naduh ki jingthiah, ki miej ki shuki bad kiwei kiwei ki tiar ba katei ka longkmie ka lah ban pyndonkam lem bad 2 tylli ki sñiang ryngkat ka sem bala aiti sha katei ka longkmie.
Haba kren naka liang u Bah FC Shulai u General Secretary ka kynhun u la ïathuh ba naka liang ka APSTA Seng kmie ka la phah ïaka Umsning Unit ban jied 8 tylli ki longiing kiba duk bad kiba la I donkam shisha ïaka jingïarap bad napdeng kitei ki 8 tylli ki longiing naka liang ki nongïalam ka APSTA ki la jied ïa ka longiing jong ka kong Elbina Marbañiang namar ba u kpa jong kane ka longiing u la khlad noh bad namar ki khun ki kti ki dang don hapdeng ka jingpule, ka kong Elbina kum ka longkmie ka hap ban trei shitom ban bylla sngi ban kyrshan ïaka iing ka sem bad ruh ban kyrshan ïaki khun ba kin ioh ban bteng ïaka jingpule jong ki watla kim don ka iing ka sem kaba biang.
Ka Kong Elbina Marbañiang, haba kren ha kane ka sngi kala pynpaw ïaka jingkmen ba ha kum kane ka sngi kyrpang ka la ioh ban pdiang ïaka iing kaba itynnad bad kaba paka ba kan ioh ban shong ban sah lem bad 4 ngut ki khun jong ka namar ha kipor kiba mynshwa ki hap ban shong ban sah haka iing kaba jot kaba pei bad haba hap u slap ki hap ban pyndonkam daka dabor ban pdiang ïaka um slap namar ka jingjot jong ka tnum iing.
Ka kong Elbina Marbañiang ka la ai khublei ïa ka kynhun APSTA ba ki la pynioh ïaka iing kaba itynnad bad kaba skhem bad ha kajuh kapor ka kitbok kitwriang ruh ïaki nongïalam jong ka kynhun ba kin nang ioh ïaka jingkyrkhu na u Blei khnang ba kin nang lah ban bteng ïa kum kine ki kam isynei ban sngewlem naka bynta kiwei pat ki longiing kiba duk kiba donkam shisha ka jingïarap.
