Nongpoh, Nailur 16 Hadien ba la bun tylli ki snem ba ka Ri Bhoi District kam shym la ioh shuh ia kita ki nongmihkhmat ban long kum kita ki myntri hapoh ka kynhun ki myntri sorkar ha ka jylla, ka Synjuk ki Rangbah Shnong Ri-Bhoi District mynta ka sngi ki la pynaw ia ka jingsngewkmen kaba shi katdei ei ba u MLA ka Jirang u Bah Sosthenes Sohtun u la sah jied ban long kum u myntri sorkar bad ruh ban shah pynbam smai kum u myntri kaba dei ruh hadien ka jingbujli u myntri Rangbah ka jylla ia ki 8 ngut ki myntri sorkar.
U Bah PB Sylliang General Secretary ka Synjuk ki Rangbah Shnong Ri-Bhoi District, u la ong ba kum ka synjuk ki Rangbah Shnong na Ri Bhoi District, ki dap shisha da ka mynsiem jong ka jingkmen ba u Bah Sosthenes Sohtun MLA ka Jirang u la shah jied kum u myntri sorkar ba kum ka synjuk ka khmih lynti ruh ba un ai ka jingshakri kaba bha tam ban kyntiew ia ki kam pynroi ha Ri Bhoi District bad ha ka jylla hi baroh kawei.
Shuh shuh, u la ong ruh ba ka synjuk ka ai ruh ia ka jingkitbok kitrwiang ia u Bah Sosthenes Sohtun ba un ioh ia ka met kaba koit ba khiah bad ruh ba u BLei un ai ia ka jingstad ba un shakri ia ka jylla lyngba ki jingialam lynti jong u Blei ba ki kam kiba u leh kin long shisha ka jingmyntoi na ka bynta ki paidbah ka Ri Bhoi khamtam bad ha ka jylla hi baroh kawei.
