Shillong, Nailur 17:U Superintendent of Police (SP) ka East Khasi Hills u Bah Vivek Syiem ula ïathuh ba katkum ka Post Mortem, la paw ba i heprit Insaphira Lyngdoh Mawnai (4 snem ka rta) i khlad namar ka jingngam jyllop bad kam don kano kano ka dak shah thombor.
Haba kren shaki lad pathai khubor u Bah Vivek ula ïathuh ba naduh bala Register iaka Case ha Rynjah Police Station, ka kynhun Special Investigation Team (SIT) kala sdang ka jingtohkit bad kala ioh ban bishar bniah ïa u khynnah ba dang 13 snem uba dei ruh u para marjan jong i heprit.
U Bah Vivek ula ïathuh ba hadien bala bishar bniah ïa u khynnah 13 snem la wanrah hakhmat ka Social Welfare Committee ban pynlong ka jingtohkit.
“Hapdeng ka jingtohkit u khynnah 13 snem ula kubur ba ha kato ka sngi ula ïalam ïa i heprit daka ba phah kiew na kynroh jong ka iing ba i sah bad kila leit sha kato ka iing kaba dang shna thymmai bad namar ba kila ktieh ki kjat kila leit ban sait ha kato ka jaka. Ha kato ka sngi ka um ruh ka dap bad ula phla ba ula ur bad hapdeng ka jingur ula kum tan lang ïa i heprit, ha kaba I heprit ila ngam jyllop syndon ha kato ka jaka ba dap um kaba ym duna 2 phut” la ong u Bah Vivek.
U Bah Vivek ula ïathuh ba u khynnah ula kubur ba hapdeng ka jingtieng ula ban ruh da u maw halor met i heprit. “Hapdeng ka jingtohkit la ïohi ruh ba une u khynnah u don ruh ka dien mong na kjat” ula ong.
U SP ula ong ba haduh mynta ka jingtohkit ka dang iai ban pynthikna la ka jingiap i heprit kadei ka jingbakla ne kaba la don lypa ka jingthmu ban shim iaka jingim i heprit hynrei ka kaiphod jong ka Post Mortem ka kdew beit ba ka jingiap kadei hi ba ngam jyllop bad ka kam don kano kano ka dak mong ha met i heprit
Haba kylli u SP ula ïathuh ba ka jingjia bad ka jingiap i heprit kadei hi haka jaka ba lap iaka metiap.
“Haduh mynta ngi la lah ban pynshai ba u khynnah 13 snem u don lang bad i heprit hynrei ngi donkam ban tohkit bniah la kadei kaba bakla ne kaba la thmu lypa ban shim iaka jingim i heprit namar kata ngi la rah ïa u khynnah hakhmat Juvenile Justice Board” la ong u SP.
