Shillong, Jylliew 16:
Ka Joint Action Committee (JAC) jong ki shnong kiba kynthup iaka Umkiang, Ratacherra, Dona Skur, Dona Umbluh, Pyrtakuna, Kuliang, Borsara, haduh Tongseng ha ka jingialang paidbah kaba la pynlong ha ka 15 tarik jong u bnai Jylliew 2024 ha Community Hall, Umkiang ka shim ia ka rai ban iakhih da kaba pakhang surok khlem buh por halor ka jingleh meinah ka sorkar ban maramot ia ka surok National Highway naduh Malidor sha Tongseng ter ter kaba la buh jingeh shikatdei ia ki paidbah nongleit nongwan.
Katkum u kyrwoh ba la phah da u Bah Lasting Pala, Chairman jong ka JAC, la iathuh ba katei ka jingpakhang surok kan sdang naduh ka 19 tarik jong u bnai Jylliew 2024 naduh ki bynta jong ka Malidor shaduh Tongseng kiba dei ki jaka kiba hap hapoh ka Elaka Narpuh jong ka East Jaintia Hills District.
Utei u nongialam ka JAC, u la pyntip ruh ba kane ka jingpakhang ia katei ka surok bah National Highway kadei kaba khlem buh por bad yn weng tad haduh ba ki bor ba dei khmih jong ka sorkar jylla, ka National Highway Authority of India (NHAI) lem bad ka National Highways and Infrastructure Development Corporation Limited (NHIDCL) kin maramot bad shna pyndep ryngkat ki nala um kiba paka.
Halor kane ka bynta, na ka liang ka JAC ka wer bad kyntu ia baroh ki paidbah nongshong shnong ka thain bad ki nongleit nongwan ruh kumjuh kiba pyndonkam ia katei ka surok bah National Highway 6, ba kin ai ia ka jingkyrshan bad snoh kti lang bad kane ka jingiakhih jong ki paidbah na ka daw jong ka jingleh meinah bad kuman ka sorkar jylla.
