Nongpoh, Nailur 29:  Ban phai khmat kyrpang sha kito kiba don ka jingduna ha ki dkhot met bad na ka bynta kito ki riew tymmen kiba la noh ka rta, ka ophis u Block Development Officer ka Umsning C&RD Block mynta ka sngi u la pynlong da ka jingsam ia ki tiar jingiarap sha kito kiba don jingduna ha ki dkhot met bad ruh na ka bynta kito ki riew tymmen kiba la noh ka rta (Senior Citizen).

Ia kane ka jingsam ia kitei ki tiar la pynlong ha Conference Hall ka Umsning C&RD Block ha kaba la wan ban shim bynta da u Bah Charles Marngar kum u kongsan bad la sakhi lang ruh da ka jingdon lang u BDO ka Umsning u Bah Andrew Myrthong, ka District Socieal Welfare Officer ka Ri Bhoi ka Kong S. Sun, ki nongmihkhamt na ka Artificial Limbs Manufacture Corporation of India, kaba la iarap kyrpang ia kitei ki tiar sha kitei ki briew ba don jingduna ha ka dkhot met bad ki riew tymmen.

Kine ki tiar ba la sam mynta ka sngi ki kynthup naduh ki Wheelchair, ki Trycyle , ki Diengduh na ka bynta kiba dkoh bad ki bym nangiaid, ki tiar jingpynpsawa lane ki Stranger Sound System sha kita kiba duna Dkhot met kiba don ia ki sap ha ka rwai ka siaw, u tiar pyniohsngew lane u Ear Machine Device na ka bynta kito ki bym ioh sngewbha  ha ki skhor bad kiwei kiwei.

Kine ki tiar ki dei ruh ba la sam kyrpang tang na ka bynta kito kiba hap ha ka Mawhati bad Umsning Constituency, ba kynthup ia ki riew tymmen ba la kot 243 na Mawhati bad 360 ngut na Umsning bad haba khein lang ki la kot sha ka 603 ngut. Kiba duna dkhot met pat ki kynthup 26 ngut na Mawhati bad 48 ngut na Umsning Constituency ba la kot 74 ngut na kine ki ar tylli ki Constituency.