Nongpoh, Risaw 01: U MLA ka Mawhati Constituency u Bah Charles Marngar mynta ka sngi u la ong ba ma u kum u MLA ka Mawhati bad wat baroh ki MLA NPP na Ri Bhoi ki dap da ka mynsiem jong ka jingkmen ba u Myntri rangbah ka jylla u Conrad K. Sangma u la ai bhah ia u Bah Sosthenes Sohtun ban long kum u myntri sorkar na Ri Bhoi District.

Haba ia kren bad ki Nongthoh Khubor mynta ka sngi hadien ka jingpynkup burom ka NPP Ri Bhoi ia u Bah Sosthenes Sohtun kum u Myntri sorkar, u Bah Charles Marngar u la ong,  Kane ka jingai bhah u Myntri rangbah ka hylla ia u Bah Sosthenes Sohtun ban long kum u myntri sorkar, ka long shisha ka jingmyntoi na ka bynta ki paidbah ka them Ri Bhoi ha ki san tylli ki Constituency. U la ong ruh ym dei tang ma u, uba la kmen eh ban ioh myntri sorkar na Ri Bhoi, hynrei ki MLA NPP naduh u Bah Damanbait Lamare, u Dr. Celestine Lyngdoh ki don kajuh ka jingsngew ban ia kmen lem ryngkat ki nongialam ka NPP na Ri Bhoi ba ka jingkhmih lynti ka long ban ioh Myntri sorkar na Ri Bhoi u ban peit lem ia ka eh ka shon ki paidbah ha Ri Bhoi District.

Shuh shuh, u la ong ruh la 2 snem shiteng ka Ri Bhoi kam don satia ia u Myntri sorkar bad dei ha kane ka kynti ba mynta ba la shah jied u Bah Sosthenes Sohtun kum u myntri sorkar, ba kum ki nongmihkhmat bad ki nongialam na Ri Bhoi ki da sngewnguh shisha ia u Myntri rangbah uba la pynmih uwei u myntrei sorkar na Ri Bhoi ban shakri ym tang ia ka dong ka thain Ri Bhoi ha ki 5 tylli ki Constituency, hynrei ban shakri sha baroh ki Constiteuncy kiba don hapoh ka jylla, u la bynrap.