Nongpoh, Risaw 05: Ha kawei ka jingjia akisiden ba shyrkhei kaba la jia mynta ka janmiet ha Umsawnongkharai ha ka surokbah National Highway-6 ha Ri Bhoi, 2 ngut ki rangbah briew ki la iap hashen bad uwei pat u la mynsaw jur hadien ba shah syllad ha kawei ka Trok kaba la wan kylla na shiliang sha shiliang ka surok bad ban syndon ia katei ka Kali Bolero.

Katei ka trok ka don ia u number ML 05-L-4368 kaba dang wan na ka thain Shillong ban hiar sha Nongpoh, hynrei hadien ba la poi ha katei ka jaka, ka la ryngkoh sha shiliang ka surok ban rad bad ban syndon ia katei ka Bolero kaba don ia u number ML 01-7455 haduh ba ka la pra phom bad 2 ngut ki rangbah ki la khlad hashen bad uwei pat u la mynsaw.

Ia utei uba la mynsaw la pynkit noh mar mar sha Civil Hospital Nongpoh ban ioh ia ka jingsumar bad kitei ki 2 ngut kiba la klad pat ki bor pulit ki dang sei bad dang pynlong ia ka jingtohkit.

La ong ruh ba katei ka Bolero ka dei ka Kali sorkar na ka tnat Sport and Youth Affair kaba dang kiew sha Shillong bad hadien ba la poi ha katei ka jaka ka la shah ban ha katei ka trok kaba la ryngkoh sha shilling ka surok haduh ba la poi sha utei u pud jong ka jingjia ba sngewsih.

Kumba la sakhi halor kane ka jingjia, ki pulit ka Ri Bhoi ruh tang mar ia ioh jingtip ki la poi mardor sha kane ka jaka ban ai ia ka jingiarap bad ruh ban dang pynlong ia ka jingtohkit kaba bniah halor kane ka jingjia bad ban tip thikna ruh ia kitei ki briew kiba la ngat ha katei ka apot jong ka jingjia ba sngewsih.