Umroi, Risaw 07: Na ka jingheh jong ka Kad Liengsuiñ Umroi kaba don mynta 5000 Square Metre bad ha kane ka kynti kaba mynta ka sorkar kan sa pynheh biang ia kane ka Kad Liengsuin sa 5500 Square Metre, na ka bynta ban ailad ia ki Liengsuin kiba heh ba kin wan hiar ha kane ka Kad Liengsuin kaba long ka jingmyntoi na ka bynta ka jylla. Haba khein kyllum hadien ba la pynheh ia kane ka Kad Liengsuin ka jingheh jong kane Kad Liengsuin kan poi sha ka 10500 Square Metre kynthup kaba rim bad kaba thymmai.
Ha kane ka jingpynheh ia kane ka Kad Liengsuin ka sorkar India lyngba ka Airport Authority of India ka la mang haduh T. 500 klur na ka bynta katei ka projek ban pynheh ia ka Kad Liengsuin Umroi.
Ban pynshai paidbah halor ka jingthmu ka Airport Authority of India ban pynheh ia kane ka Kad Liengsuin, ka
Meghalaya State Pollution Control Board (MSPCB) mynta ka sngi ka la pynlong ia ka jingpynsgew paidbah ia ki paidbah bad khamtam ki trai jaka ba kin ujor ne pynsngew lada ki don kano kano ka jingpyrshah ne ujor halor kane ka jingpynheh ia ka kad Liengsuin.
La sakhi ruh kumba long haduh mynta, ki Liengsuin kiba lah ban wan ha kane ka Kad Liengsuin ki dei tang ki Liengsuin kiba rit na ka daw ka jingrit jong ka jaka, hynrei lada lah ban pynheh noh ia kane ka Kad Liengsuin, yn sah lah ban wan ki Liengsuin kiba heh Airbus A320 kiba lah ban kit ia ki nongleit nongwan haduh 180 ngut bad lah ruh ban wan ieng haduh 5 tylli ki Airbus A320 ha kaba mynta pat dang lah ban wan ieng tang 4 tylli ki Liengsuin kiba rit.
Na ki nongmihkmat ka Airport Authority of India (AAI), ki la pynshai ruh ha kane ka sngi, ba ka jingpynheh ia kane ka Kad Liengsuin ka dei na k abynta ka Run Way, ka jaka hiar bad kiew ki Liengsuin bad kumjuh ruh ia ka Terminal.
La pynshai ruh ba la dep ban pynheh ia kane ka Kad Liengsuin, ki Liengsuin na kane ka Kad Lingsuien ki lah ban her sha Mumbai, Bangalore, Chennai bad kiwei kiwei ki nongbah ka ri India bad ka jingthmu ka long ruh ban kyntiew ia ka ioh ka kot bad ruh ban khring ia ki nongjngohkai pyrthei na kylleng ka ri bad na shabar ri ban wan beit ha kane ka Kad Liengsuin kaba kim donkam shuh ban hiar ne leit lyngba ka Airport ha Guwahati.
Shuh shuh, ha kane ka jingpynsngew paidbah, la shim bynta da ki nongialam shnong bad ki trai jaka, ha kaba kim don kano kano ka jingpyrshah bad ki kloi ban pdiang na ka bynta ka roi ka par jong ka jylla, hynrei kaei kaba ki pynsngew ka long ban ai kam ai jam ia ki samla trai jylla bad ruh ba katei ka Kad Liengsuin ka dei ban treikam beit kumba la thmu bad ym ban sangeh noh shiteng por kaba long ka jingduhnong ia ki paidbah ka jylla.
