Nongpoh, Risaw 09: U Bah Sosthenes Sohtun, uba dei u MLA, MDC bad ruh kum u Myntri ha ka sorkar jylla, ha ryngkat ka jingdon ki nongialam ka Byrnihat Sports Association (BSA), mynta ka sngi ki la pynlong ia ka jingleit jurip ia ka jingpyntrei ia ka Stadium kaba la tei ha ka jinglut kaba la kot sha ka T. 5.70 klur hapoh ka madan BSA ha Byrnihat.
Ha katei ka sngi, ba la pynlong ia ka jingleit jurip ia katei ka Stadium, la sakhi da ka jingdon ki nongialam bad ki dkhot ka BSA, kiba kynthup ia u Bah Wanphrang Lyngdoh kum u General Secretary, u Bah Jayan Sylliang, Vice-President lem bad kiwei.
Lyngba jong katei ka sngi, nalor ba la pynlong ia katei ka jingleit jurip, na ka liang ki nongialam ka BSA, ki la pynkup burom ruh ia u Bah Sosthenes Sohtun, kaba long kum kata ka dak jong ka jingburom, namar ba u long kum u President ka BSA, nangta kum u MLA, MDC bad ruh kum u Myntri ha ka sorkar jylla.
Haba kren ha katei ka sngi, u Bah Sosthenes Sohtun, u la ong ba la tei ia katei ka Stadium ha ka jinglut kaba la kot sha ka T. 5.70 klur bad uba la ong ruh, ba un sa pynioh shuh kiwei ki jingiarap na bynta ban pynbha shuh shuh ia ki bynta ka madan ialehkai, ki jingker ia ka madan lem bad kiwei pat ki jingdonkam.
