Nongpoh, Risaw 10: Namar ba la bun palat ki jingjia ba sngewsih kiba ju jia ha ka surokbah National Highway ba bun ki mynsiem ba kordor ki la duh ia la ka jingim tang na ka daw ka jingniah bauaid ki dribar bad ba niah khlem akor ia ki Kali, ki heh ophisar ka Ri Bhoi naduh u Deputy Commissioner u Abhilash Baranwal, u Senior Superintendent of Police ka Ri Bhoi u V.S Rathore bad u District Transport Officer ka Ri Bhoi u Bah A. Kharmon ki la hiar surok syndon ban ia khynra lang ia ki Kali ba pynkheiñ ain.

Na ka liang ka bor synshar District ba la ia trei lang naduh ka ophis u Deputy Commissioner, ka ophis u SP ka Ri Bhoi bad ka ophis u District Transport Officer ki la ia trei lang ban khynra Kali mynta ka janmiet ha Nongpoh bad ha kiwei ki jaka ba kham long sor kum a Byrnihat, Khanapara, Umsning bad Khapmara ha kaba ki bor pulit bad ki ophisar ki la bat naphang khlem jingmap ban dain kuna ia kito ki Kali ba pynkhein ain.

Kane ka jingtehlakam ka kynthup naduh ki dribar ba dih buaid ha ka por ba niah kali, ka jingbym deng Helmet, ka jingpynher sted ia ki Kali, ka jingbym biang ki kot ki sla, ha kaba khlem map iano iano ruh tang shu lap la dain bein da ka kuna kiba dei katkum ka kyndon jong ka aiñ.

Ha kane ka jingkhynra Kali bun ki kali kiba pynkhein ain ki la hap ban siew ia ka kuna lyngba ka e-challan ha kaba la dain kuna ia ki Kali ba pynkhein ain. la ioh lum jingtip ruh la kumno kumno tang mynta ka janmiet la ioh dain kuna haduh T. 3 lak duna na ki Kali ba pynkhein ain haduh ba thoh ia kane ka khubor bad ka jingkhynra Kali ka dang bteng shakhmat.