Nongpoh, Risaw 13: Ban lum ïa ki sakhi sabut halor ka jingshah pynïap kawei na ka Heprit ba dang 13 snem ha kawei na ki shnong ha Ri Bhoi District, ki Pulit ka Ri Bhoi ba la ïalam da u Senior Superintendent of Police u VS Rathore bad u Additional Superintendent of Police u BahOrville Massar lem bad ka kynhun ki Pulit ki la ïalam ïa u runar sha kawei ka khlaw ïa u runar kaba dei ka jaka ba u la leh ïa ka kam bymman na ka bynta ban lum ïa ki sakhi ki sabut.

Na ka liang ki Pulit ka Ri Bhoi hynnin ka sngi U Blei ki la hiar sha katei ka khlaw ryngkat utei u runar ba la tip kyrteng kum u Ïainehskhem Kharsati, kaba long shi bynta ban bteng ka jingtohkit halor ki rukom kiba u la leh ïa katei ka kam bymman.

Ki Pulit ka Ri Bhoi, ki la leit ïalam ïa utei u runar sha katei ka jaka, ka dei ruh hadien shi sngi ba ki la ioh ban kem ïa u halor ka jingkynnoh ba u la leh ïa katei ka kam bymman.

Ha kane ka sngi, nalor ka jingdon lang ki heh pulit ka Ri Bhoi la ïa don lang ruh ka kynhun Forensic Crime Scene Unit  na ka tnad Pulit, ha kaba kum ka kynhun ki la tohkit bniah ban lum ïa ki sakhi ki sabut na katei ka jaka kaba utei u runar u la batai halor ki kam bymman kiba u la leh pyrshah ïa katei ka heprit.