Nongpoh, Risaw 13: Ki VDP ka shnong Umphyrnai ha East Khasi Hills hynnin ka miet jong ka sngi u Blei ki la pynlong ia ka jingpeitngor hapoh u pud u sam jong ka shnong ka thaw, hynrei ha katei ka jingpahara ki la ioh bat pynban ia kawei ka Kali Alto Tourist kaba kit Masi bad la suba jur ba lah ban dei u u Masi ba ki shu tuh.

Kane ka jingsuba ki VDP ba u dei u Masi tuh, ka dei hadien ba la ioh bat ia katei ka Kali ba kit Masi, ha kaba 2 ngut ki la phet krad  noh na katei ka jaka bad la ioh bat sa tang 2 ngut.

Katei ka Kali ba la kit ia u Masi ka don ia u number ML 05-Q-3978 bad ha kane ka Kali ki don 4 ngut kynthup ia 2  ngut ba la ioh ban bat ba la tip kyrteng kum u Wonderful Be bad u Goliat Sujai kiba dei na ka thain Umtngam Tyrso  bad kiba la ioh phet la tip kyrteng kum u Shaniah Lamare bad u wei pat ba la ju khot kyrteng sin kum u Pe na ka thain Umtngam Byrsiej ha Ri Bhoi.

Kumba la iathuh da u Bah Henry Dkhar, uba dei u Knight ka VDP Umpyrngai bad u Rangbah Dong katei ka shnong, la ong ba hadien ba la ioh bat ia kane ka Kali bad ia kitei ki 2 ngut, ki la tohkit bniah na kitei ki 2 ngut kiba la len ia lade ba kim tip ei ei shaphang utei u Masi bad katba kitei ki 2 ngut pat ki la shu phet krad jyndat ha kaba la suba ba u lah ban dei u masi uba ki tuh bad lada ym dei ba ki tuh balei ki hap ban phet krad ia lade.

Shuh shuh, u la iathuh ruh hadien ba la tohkit bniah bad ba kim shym la phla, na ka liang ka VDP ka la leit ban aiti noh sha ki Pulit ka Madanryting ban leh ia kaba donkam bad ban tohkit bniah halor ka jingioh bat ia kane ka Kali bad utei u Masi ba la suba jur ba u dei u Masi uba ki shuh tuh.

Ha kawei ka bynta u Bah Dkhar u la kyrpad ruh ia ki bor ka ain ba kin pyrkhing bha ia kine ki kam tuh bad ruh yn nym dei ban don kiba thied ia ki mar tuh, namar lada don kiba thied ia ki mar tuh ka jingtuh jingthim ruh ka dang kiew bad kane ka ktah ia ki paidbah.