Guwahati, Jylliew 17: Ka jingther u lapbah ha kine ki khyndiat sngi kala wanrah ka jingshlei um ha kylleng ki jaka jong ka sor Guwahati ba kynthup ïaka thaiñ Anil Nagar bad Chandmari kaba la pynthud ruh ïaka leit ka wan jong ki paidbah haduh ba ki surok bad ki lynti ïaid jong ki paidbah bad tap bad shlei da ka um.
Naka liang ka Indian Metrological Department (IMD) kala maham ba ka jinghap slap kan dang neh da kumba 1 taiew eiei bad ka sor Guwahati ka lah ban mad ka jingeh kaba khraw shuh shuh ha kine ki khyndiat sngi ban wan ha kaba naka liang ki bor ba dei peit jong ka sorkar Assam kila bthah ïaki paidbah ban phikir bad ban wad ki jaka rieh tngen kiba kham biang.
Lah ruh ban kdew hangne ba ha kine ki 24 kynta bala leit noh, u slap ba jur u la ther ha kylleng ki jaka jong ka jylla Assam kaba la pynlong ruh ïaka wah Brahmaputra bad kiwei ki shnat jong katei ka wah ban kiew sted bad kane ka jingkiew jong ka um kala pynthud ruh ïaki surok kali, ka jingïaid jong ki rel haka thaiñ Shatei Lam Mihngi naka jingtwa khyndew bad jur slap.
Naka liang ka IMD kala maham ruh ïaki paidbah ba ka jingshlei um ka lah ban dang jur namar haduh mynta ym pat I dak eiei ba u slap un duna bad naka liang ki bor jong ka sorkar Assam kila long kiba pynkhreh kino kino ki lad jingïarap ba kyrkieh ïaki paidbah.
SHLEI UM BUN JAKA HA GUWAHATI NAKA JINGTHER U LAPBAH, YN DANG NEH U SLAP MAHAM KA IMD
