Nongpoh, Risaw 30: Ban wan rah ia ka jingiatylli bad ka jingiatrei lang hadpeng kki samla bad ki Pulit na ka bynta ka koit ka khiah ki samla bad ruh ban ia trei ryngkat ban ia khun pyrshah ia ki kam sniew, ka Khanapara Police Station mynta ka sngi ka la pynlong da ka Run for Unity kaba 5 km ka jingjngai kaba la sdang nad ka khyrdop ka skulbah USTM sha Mandan Jorbil ha kaba la wan ban shim bynta shirhem da ki samla pule bad ki samla shnong.

Kane ka jingpynlong ia ka Run For Unity ka dei kaba la pynlong da ka ophs u Superintendent of Police ka Ri Bhoi ha kaba ia kane ka jingmareh thong yn pynlong ha man la ki Police Outpost bad Police Station kiba don ha Ri Bhoi bad ka thong jong ka tnad Pulit ka long ban wan rah ia ka jingiatylli hapdeng ki samla bad ki Pulit ban don kata ka jingiatrei lang ha kaba iakhun pyrshah ia ki kam sniew kiba ktah ia ka shongsuk shongsain ki paidbah.

Ia kane ka Run For Unity la sdang kaba la sdang na ka khyrdop ka skulbah USTM sha Madan Jorbil la don lang ruh u Chancellor ka USTM u M. Hogue, u Officer Incharge ka Khanapara Police Station u P. Baida, u Bah Kitbor Khongiong rangbah Shnong ka Umlangpur, ki samla pule bad ki nongshong shnong katei ka thain.

Na ka liang ka tnad Pulit ka la sam ruh ia ki khusnam lyngba ka pisa bad ka Trophy sha ki nongjop kane ka Run For Unity kaba long kum ka jingpynshlur, ha kaba na ka liang ki kynthei la rah ia ka nam lahduh da ka samla B.Jyrwa, ka nam kaba ar la rah da ka samla S.Longchum bad ia a kyrdan balai la rah da ka samla Belovely Syiemlieh bad na ka liang ki shynrang pat ia ka nam lahduh la rah da u samla Richmond Lyngdoh Mawlong, ka nam baar la rah da u Toshi Khrimey  bad ia ka nam kaba lai la rah da u samla Orpan Nongrum.