Nongpoh, Naiwieng 03: Kumba mynta janmiet ka jinglap ia kawei ka pla ïong harud ka surokbah ha Nongpoh ka la pynkhihwin ia ki paidbah bad pynher mynsiem ruh ia kiba bun ki nongshong dukan hajan kane ka surokbah, hynrei hadien ka jingwan poi ka kynhun Bomb Squad la lah ban pynthikna ba kam dei satia ka pla ba don bom bad ka dei tang ka pla ba don ki jain phong.

Kumba la sakhi mynta ka janmiet da ki hajar ngut ki paidbah ki la wan peit ia katei ka pla ïong kaba don harud surok, ha kaba la khang ia ki nongshong dukan bad ki paidbah ba tur sha jan, namar ka jingsuba ioh lah ban don u Bom hapoh katei ka pla bad phewseh ha ka jingtalasi ki Pulit bad ka kynhun Bomb Squad la lap pynban ba ka dei tang ka pla ba thep ia ki jain ba la suba ba la kum klet da mano re mano.

Hadien ka jingtalasi ki pulit la lah ban sei ia kitei ki jaiñ na katei ka pla ïong bad la lap ba don tang ki sweater, ki patlun bad ki jain phong ba la kum klet da mano re mano ha katei ka jaka.

Kum ban pynkynmaw, ki bor pulit ki la hap ban shim khia ia kane ka jingsuba hapoh katei ka pla, ka dei namar dang shen ruh la lap ia ka kynja pla iong ha Umsning ba la suba ba dei u bom bad ha ka jingtohkit ki pulit la lap shisha ba dei u Bom IED bad ia kane la kam ruh ba dei ba wan buh ka kynhun HNLC kumba la mih ha ki lad pathai khubor.