Nongpoh, Naiwieng 17: Shibynta ban leh bad pyni ïa ki kam babha ha shnong, ki nongïalam ka FKJGP Nongthymmai 15mer Unit, ki la leit ban ai jingïarap sngewbha da ki Desk, Ben bad Dustbin sha ka skul kaba don ha shnong Nongthymmai 15mer, Byrnihat bad kaba la tip kum ka Nongthymmai 15mer Lower Primary School.

Ïa katei ka kam ban aiti ïa kitei ki Desk, Ben bad Dustbin sha katei ka skul, la ïalam da ki nongïalam ka FKJGP Nongthymmai 15mer Unit, kiba kynthup ïa u samla Micheal Marbanniang, kum u President, nangta u samla Banjop Makri, General Secretary lem bad ki dkhot ka seng na katei ka Unit.

Lyngba jong katei ka sngi, ba ki nongïalam ka FKJGP Nongthymmai 15mer Unit, ki la leit ban aiti Desk, Ben bad Dustbin sha katei ka skul, la sakhi da ka jingdon ki nongïalam shnong ka Nongthymmai 15mer, kiba kynthup ïa u Bah Enlin Suting kum u Rangbah shnong, ki nonghikai lem bad kiwei.

Haba ïadei bad katei ka jingleit ban aiti ïa ki Desk, Ben bad Dustbin sha katei ka skul, ki nongïalam ka FKJGP Nongthymmai 15mer Unit, ki la ong ba katei ka jingai sngewbha jong ki sha katei ka skul, ka long kum shibynta ban pyni ïa ki kam babha bad ruh ban don ka jingïatreilang bad ki bor shnong bor thaw bad sa kawei ruh ka long ba kan pynsuk ïa ki khynnah kiba leit skul ha Nongthymmai 15mer Lower Primary School.