Shillong, Naiwieng 17:U Myntri Rangbah ka jylla, u Conrad K Sangma mynta ka sngi la ioh ban plie paidbah iaka jaka ban ai jinghikai iaka ktien Japanese lane ka Japanese Traineing Programme kaba la pynlong daka Meghalaya State Skill Development Society jongka tnad Labour, Employment & Skill Development ka sorkar jylla ha Mount View Building, Barik jongka nongbah Shillong.
Ha kane ka sngi, la iadom ryngkat euh da u Myntri ka tnad Labour ka jylla, u Methodius Dkhar, u Chairman bad CEO ka Asean Group Co Ltd u Nishikwa Toshiaki nalor ki nonghikai ktien Japanese lem bad ki ophisar na ka Meghalaya State Skill Development Society.
Haba ai jingkren ha kane ka sngi, u Myntri Rangbah ka jylla, u Conrad K Sangma ula ong ba ka jylla Meghalaya ka don iaka jingiatreikam kaba iajan bad ka ri Jaoan ha kiba bun ki liang. ‘Ka rukom pyrkhat pyrdain jongngi kadei kaba shai bad kaba beit thik, ngim kwah ban don jingiateh bad baroh, naba phin nym lah ban iajan bad baroh’ la ong u Conrad K Sangma bad bynrap ruh ba ka Japan lem ki jylla ka thain shatei lam mihngi ki don iaka jingiasyriem ha kaba iadei bad ka bam bad ka kolshor bad ba ka ri Japan ka la don ia ka jingiatreilang bad ka ri India la bun bun snem.
Haba phaidien pat shaka jingiaid lynti jongka jingiatreikam bad ka ri Japan, u Conrad K Sangma u la ong ba ar snem mynshwa tang ar ngut ki nurse la phah ba kin trei sha Japan bad haduh mynta, ki don kumna 37 ngut bad la khmih lynti ba bun kin dang don ki samla kiban leit trei sha katei ka ri. ‘Ki nurse jong ngi kiba trei ha Japan kidei haka thup N4 Grading bad ngi kwah ba kin dei haka thup N3 Grade, kaba kham heh jingsiew. Ki nurse jongngi kiba trei ha katei ka ri, haba khein kyllum, ki dang ioh ban phah kumba T. 1 lak shala ing la sem bad ka Foreign Exchange kaba wan shaka jylla lyngba kine ki 37 ngut ki nurse ka long kumba T. 5 klur haka shisnem’ la iathuh u Conrad K Sangma.
U Conrad K Sangma u la ong ruh ba ka sorkar jylla ka kwah ban ai iaka rynsan iaki khun samla ka jylla ba kin ioh ban leit sha katei ka ri Japan ym tang ba kin ioh kamai kajih, hynrei ba kin ioh jingtbit ruh kumjuh. ‘Kane kadei ka jingiatrei ryngkat hapdeng ka kynhun ASEAN bad ka sorkar Meghalaya ka pynbiang nadong shadon ia kane ka kam. U la pyntip ruh ba ki 37 ngut ki Nurse kiba la don mynta shaka ri Japan ki la hap shwa ban leit shan hikai pyntbit shaka nongbah Bangalore na bynta hynriew bnai, bad pynpaw ruh ia ki samla ba ki long kiba donbok ba mynta kim donkam shuh ban leit shah hikai pyntbit shaduh katei ka nongbah Bangalorez hynrei kin ioh beit hangne ha nongbah Shillong.
Haba pdiang burom ia ar ngut ki nonghikai na Japan, u Myntri Rangbah u la ong ba ki lah ban don ki jingeh hangne hangtai, hynrei ka sorkar Meghalaya lem bad ki paidbah, kin leh katba lah ban ai kaba bha tam ia kitei ki nonghikai ba kin sah ha ka jylla.
Shuh shuh, naka liang u Myntri Rangbah ka jylla, u buh ruh ka jingkyntu shabki samla pule ka jylal ba kin shim ia kane ka kabu ba kin pynjanai bad pyniar iaka sap ka phong ka jongki na ka bynta ba kin iohkam iohjam
Kumba long mynta, kumba 86 ngut ki samla pule ki la registered ialade naka bynta ka jingai jinghikai pyntbit iaka ktien Japanese kaban long haduh 6 bnai kynthih kaba yn pynlong daka Meghalaya State Skill Development Society ha Mount View Building, Barik jongka nongbah Shillong.