Nongpoh, Naiwieng 19: Ha ka jingjia iatyngkhuh kali, kaba la jia hynne ka step ha surokbah NH-6 bad kaba hap ha shnong 12Mer, Byrnihat, kata hapdeng ka Maruti Alto bad ka Toyota Innova, ka la wanrah ia ka jingkhlad noh u nongniah ka Maruti Alto bad arngut kiba shong hapoh ka Toyota Innova, ki la mynsaw jur.

Katei ka jingjia aksiden, ka la jia ha ka por 10:30 baje eiei mynstep, ha kaba ka katei ka Maruti Alto kaba don ia u number ML-10-A-7049, katba katei ka Toyota Innova kaba don ia u number ML-10-S-0011 bad kaba la niah da u Manish Kumar Jha 39 snem ka rta.

Katei ka Maruti Alto ka dei kaba mih na Byrnihat ban leit sha Umtyrnga, katba katei ka kali Toyota Innova ka dei kaba thmu ban kiew sha Byrnihat, hynrei haba la poi ha 12Mer, katei ka Maruti Alto namar jingniah stet, ka la rynsied na shilliang sha shilliang ia ka surok bad tynrah ia katei ka kali Toyota Innova, kaba wan na liang pyrshah, kaba la pynlong ruh ia kitei ki ar-tylli ki kali ba kin julor eh.

La ïoh jingtip ruh, ba ha katei ka Maruti Alto la shong tang u Bah Helin Lyngdoh marwei, katba ha ka kali Toyota Innova la shong da Lai ngut kynthup ia u nongniah, ha kaba arngut kiba shong ha Innova ki la mynsaw, ia kaba la pynkit noh mar mar sha ki jaka sumar ha Guwahati.

Tang mar ia tip halor katei ka jingjia, ki Pulit ka Byrnihat Police Outpost, ki la poi mar mar ha katei ka jaka ba la don ka jingjia aksiden, kiba la pynkit ruh da ka Ambulance ia Bah Helin Lyngdoh sha Byrnihat CHC, hynrei haba la poi ha Hospital, ki Doktor ki ong ba utei u Rangbah u la dep khlad shwa ban poi sha jaka CHC Byrnihat.