Nongpoh, Naiwieng 29: Ban phai khmat lem sha ki longïing kiba ban ka jingduk ka jingkyrduh bad kiba donkam shisha ia ka jingiaram na ka imlang ka sahlang, ka Namsha Nongtham Pastorate C.E Union mynta ka sngi ka la leh ia ki kam isynei da kaba synñiang da ki jainkup thiah bad ka song pisa sha ki 14 tylli ki longïing baduk ha ka jingialang kaba la long ha ha phyllaw jong ka Skul Kdohhati Ri Bhoi Presbyterian Synod Secondary School, ba hap ha ka Mawhati Constituency.

Ha kane ka jingsam ia kitei ki jainkup thiah bad ka song pisa sha kitei ki longïing la don lang u MLA ka Nongpoh u Bah Charles Marngar ha ryngkat ka jingdon lang u Rev. H.L Marsing, ki dkhot ka CE Union lem bad kiwei kiwei ki riew rangbah.

Kumba la pynpaw ha kane ka sngi, ia kitei ki lad jingiarap la ioh ban aiti sha kitei ki longïing ka dei lyngba ka jingkynshew pisa kaba mih na ka Gospel Concert ba la pynlong ha u snem 2024 ha Mawhati.

Haba kren ha kane ka sngi u Ref. H.L Marsing, u la iathuh ba kane ka jingnoh synniang sha ki longïing baduk kam dei satia tang ia ki paid riewngeit ka Balang Presbyterian bad la sam  kyllum ruh sha kiwei ki ki jaid balang Kristan kiba dei na ka thain Mawhati.

La ong ruh ba ka jingthmu ka C.E Union ka long ban ai jingiarap sha ki Longiing baduk kiba dei ki paradoh parasnam na ka jaid bynriew Khasi bad kane kadei ka sien kaba ar ba na ka liang ka C.E Union ka la lah ban ai jingiarap sha kiba duk kiba donkam ia ka jingiarap bad ruh ban dang iai bteng ha ki snem bad ki por ban sa wan.

Haba ai jingkren na ka laing u Bah Charles Marngar kum u nongmihkhmat paidbah, u la ai kata ka jingiaroh ia ki Nongialam jong ka C.E Union kiba la shim ia ka sienjam kaba khraw ban noh Synñiang ia ki jingiarap sha ki Longiing kiba duk kiba kyrduh bad u la ong ruh ba na ka liang jong u kum u nongmihkhmat un dang ai ka jingkyrshan ia ka C.E Union ban ia trei lang ha kino kino ki kam ba bha ha ka imalang ka sahlang.