Nongpoh, Naiwieng 30: Ki Pulit ka Nongpoh Traffic Branch mynta ka sngi u Blei ki la pynlong ïa ka jingkhynra ïa ki Kali ha ka surokbah National Highway-6 hajan ka ophis u Deputy Commissioner na ka bynta ban dang tehlakam ïa ki Kali kiba pynkheiñ aiñ bad kiba ym bud satia ïa ki kyndon jong ka Traffic rules.

Ïa kane ka jingkhynra ïa ki Kali la ïalam da u Sub Inspector D. Baishya bad u Sub Inspector A. Ramde ryngkat ka jingdon lang kiwei kiwei ki Pulit, ha kaba ki la bat naphang ïa ki Kali ban tohkit bad ruh ban dang pynshai halor ki kyndon aiñ ñiah Kali.

Kum ban pynkynmaw, ka tnad Pulit na Ri Bhoi ka la trei bor bah bha ban tehlakam ïa baroh ki Kali paidbah ba ki hap ban bud ïa ki kyndon aiñ bad la leh ruh ïa kane na ka bynta jingshngaiñ ki dribar bad ki nongshong Kali bad ruh ki paidbah ba ïaid ba ieng lyngba kane ka surokbah ha Ri Bhoi District.

Kumba la ioh lum jingtip, ha kane ka jingkhynra ne talasi ïa ki Kali, dang don bun kiba dang pynkheiñ ain bad  kiba ym bud satia ïa ki kyndon aiñ bad na ka liang ki bor pulit ki la pyngngat beit kakum ki kyndon halor kane ka jingpynkheiñ ain ba kynthup naduh kiba dih buaid, kiba ym deng seat belt, kiba ym deng helmet bad kiba pynher sted ïa ki kali.

Shuh shuh, la ong ba tang mynta ka sngi u Blei ha ka jingtalasi ne khynra ïa ki kali ba pynkheiñ aiñ ki Pulit ki la ioh ban dain kuna haduh T. 45 hajar ba la pynngat ïa ki katkum kita ki kyndon ba ki la pynkheiñ aiñ.