Nongpoh, Nohprah 01: Tang na ka daw ka jingwan tah ki runar na Assam ia ka u maw tablet jong ka skhim MGNREGA ha ka Shnong Maikhuli ban pyndap ia ki jingtoh halor kitei ki kam pynroi ba wan rah da ka sorkar Meghalaya, ka jingiakynad kaba jur ka la mih hadpeng ka kynhun na ka Shnong Maikhuli bad na Assam kaba la jia naduh hynnin ka janmiet jong ka sngi u Blei bad mynta ka step jong ka sngi Nyngkong ha katei ka shnong khappud.

Kane ka jingiakynad ka la sdang naduh hynnin ka janmiet jong ka sngi u Blei hapdeng ka kynhun na Maikhuli bad na Assam bad ia kane la lah ban tem noh da ka jingwan poi ki magistrate bad ki bor pulit na Ri Bhoi, kiba la tem ia kane ka jingiakynad, hynrei kane ka jingiakynad ka la bteng ruh haduh mynta ka step jong ka sngi Nyngkong haduh ba la poi sha ka jingiarah tiar da ka jingthmu ban ia shoh ia dat tang na ka daw ka jingwan ki briew na Assasm ban tah da ka rong ïong ia u maw jingthoh jongka skhim MGNREGA ha ka Shnong Maikhuli.

Ki bor pulit ka Ri Bhoi bad Magistrate ruh ki la poi biang mynta ka step sha katei ka shnong Maikhuli ka shnong khappud hapdeng ka Meghalaya bad ka Assam na ka bynta ban tem ia kitei ki jingiakynad bad ruh ban khanglad na kino kino ki jingiashoh iadat kiba ktah ia ka shongsuk shongsain ki paidbah ha kitei ki shnong khappud.

Haba ia kren halor kane ka jingjia bad u deputy Commissioner ka Ri Bhoi, u Abhilash Barwanwal, u la ong ba kane ka jingiakynad ka mih ha katei ka shnong khappud ka Meghalaya bad Asssam, ka dei tang namar ka jingdon ki runar na Assam kiba wan tah da ka rong iong ban pynkhuid ia ki jingthoh ia u maw jingthoh ka skhim MGNREGA kaba dei ka kam pynroi ba wan na ka sorkar Meghalaya.

U la iathuh ruh tang mar ia ioh jingtip halor kane ka jingjia, u la dep phah ia ki Magistrate bad ki bor pulit ban tem ia kitei ki jingiakynad khnang ba kan nym ktah ia ka shonguk shongsain ki paidbah.

U la kren shai ruh ba kino kino kiba don kti ha kaba wan rah jingklumar ne pynthud ia ka shongsuk shongsain ki padibah kin nym lait na ka kti ka aiñ bad na ka liang ki bor pulit kin kem beit naphang.

Na ka bynta ban tem ne khanglad ia kine ki jingiakynad, u la iathuh ruh ba u la dep kren sha u Deputy Commissioner ka Kamrup ban shim khia lem halor kane ka kam bad kumba long haduh mynta ha kaba ia dei bad ki kam pud kam sam kin tip da ka sorkar bad kino kino pat kiba pyrshang ban pynngewthuh bakla ia ki paidbah kaba ktah ia ka shongsuk shongsain kin sa shah kem bad shah pyngngat ha ki kyndon ain.

Shuh shuh, u la iathuh ruh ba dang shen la dep ruh ban thung da ka Peace Committee halor ki jingiakynad hapoh kane ka shnong Maikhuli bad  katei ka Peace Committee kan ia shong pyrkhat na ka bynta ban shim ia ki lad ki lynti ban wan rah biang ia ka shongsuk shongsain, namar ia ki kam pud ki kam sam ka sorkar jylla ka shim ia ka rai ban ia kren pynbeit bad kumba long mynta ka bor synshar Distrct kan nym ailad ban mih ki jingiakynad kiba ktah ia ka shongsuk shongsian ki paidbah.