Nongpoh, Nohprah 01: Kum kawei naki thong ban pynduhjait ïaki kam dih buaid bad ka kam shalan kyiad haka shnong Umkra, Ri-Bhoi District, ka seng longkmie jong katei ka shnong ha ka miet jong ka sngi Saitjaiñ kala khang lynti bad ap dong ïa kawei ka kali kit kyiad bala thmu ban die ha katei ka shnong, bad namar ba dei tang ki longkmie kila pyntip ruh sha ki VDP bad kumjuh ruh ki VDP jong ki shnong ba marjan ban ïarap lang ioh mih kano kano ka huri hura na kitei ki nongshalan kyiad.

Hadien ka jingpoi lang ki VDP ha katei ka miet la ioh ruh ban talasi ïa kawei ka kali kaba la suba kit kyiad bad haka jingtalasi la lap shisha ba don kumba 10 byrni ka kyiad pyrsi kaba dei jong u Bah Phias Laloo bala ñiah pat da u Bah Roibok Manih.

Hadien katei ka jingioh bat naka liang ki longkmie bad bor shnong kila pyntip ruh sha ka Synjuk ki Rangbah Shnong Marngar, Umsaw Nongbri to Umkra bad mar mar hapoh ka jingïalam u Bah Mission Tron kum u President kila leit sha katei ka jaka ban bat ïa kitei ki nongkhaii kyiad bad dei mynta ka sngi naka liang ka Synjuk ki Rangbah Shnong kaba don ruh kumba 22 tylli ki shnong ha katei ka thaiñ haka jingdonlang u Bah BK Tmung Adviser, Bah Mission Tron President, Bah Phaintis Syngkli Secretary kila tian bishar ïa u nongñiah bad kumjuh ruh u trai jong katei ka kyiad ryngkat ka daiñ kuna ba kim dei shuh ban dang mlien ban bteng ïa katei ka kam nangne shakhmat.

Shuh shuh naka liang ka Synjuk kum ka jingpynduh jait ïaki kam sniew bad ki kam khaii kyiad sha katei ka thaiñ kala maham da kaba tyngeh ïa baroh bad thang syndon baroh 10 byrni katei ka kyiad haka jingdonlang ki longkmie, ki VDP bad ki bor shnong bad ki nongïalam ka Synjuk.