Nongpoh, Nohprah 03: U Bah C.B Syiem, CEM barim ka Khasi Hills Autonomous District Council (KHADC), u la mih shakhmat ban pynpaw sha ka pyrthei halor ka jinglong trai jong u ia ka jaka ba don ka Karkhana sain jri, kaba don ha ka shnong Mawsmai, Ri Bhoi bad kaba dei ruh ka Karkhana kaba ju mih ki huri hura na ka jingbymbiang ki kot ki sla jong uwei u bar jylla uba la tip kum u Rohit Kapoor, uba shim wai ia katei ka jaka na u Bah C.B Syiem naduh ki snem 2017.

Haba pynshisha halor ka jinglong trai ba katei ka dei ka jaka jong u, u Bah C.B Syiem, hynnin ka sngi, u la leit sha katei ka jaka da kaba pyni ruh ia ki kot ki sla, kata naduh ka por kaba u thied kyntoit kyntoit, ha kaba ia kawei ka jaka u la thied na u bah Ricky Shakwa, na ka Kong Agnes Wahlang bad na ka Kong Yomina Shabong, ynda u la dep thied ia kitei ki jaka, u la register pat ha ka kyrteng lajong bad hadien katto katne por pat, u la aiwai sha uwei u briew uba la tip kum u Rohit Kapoor.

Lyngba jong katei ka sngi ba u Bah C.B Syiem, u la leit sha katei ka jaka, u la rah ia baroh ki kot ki sla kiba donkam, kata naduh ki kot kiba iadei ia ka jingpynshisha kaba u la ioh na ka shnong, na ka raid bad wat na ki bor ka ain ruh kumjuh.

Haba kren sha ki lad pathaikhubor, u Bah C.B Syiem, u la ong ba u don ia baroh ki jingpynshisha halor ka jinglong trai jong u ia katei ka jaka bad ha kawei pat ka liang, u la ai ka jingiaroh ia ki katto katne ki kynhun sengbhalang, kiba la leit ban khynra kot khynra sla na u Rohit Kapoor, uba la pyniaid ia ka Karkhana sain jri ha katei ka jaka jong u, kaba ma u kum u trai jaka lem bad utei u bar jylla, uba la shim ia ka jaka jong u, kim don shuh ka jingiasngewthuh jingmut naduh ki snem kiba la leit.