Nongpoh Nohprah 3: Kumba la sakhi ba ka jingsiang rong ia ka surok na Nongpoh sha Umden ba la ju tip ruh kum ka surok Nongpoh-Unden-Sonapur ka la iaid shaid shaid  bad na ka liang u MLA ka Nongpoh U Bah Mayral Born Syiem mynta ka sngi ha ryngkat ka jingdon lang ki ophisarna ka tnad PWD ki la leit ban jurip ha shi lynter ka surok kaba la sdang ban siang rong mynta naduh na Lad Iewmawlong shaduh ka Shnong Marngar.

Kum ban pynkynmaw, kane ka surok kaba shakri na ka bynta ki paidbah jong ki spah tylli ki shnong ha ka leit ka wan, ka dei ruh ka surok kaba la pynjynjar ia ki paidbah nongleit nongwan la bun snem mynta, hynrei mynta ka la long ka jingkyrkhu ha kaba da ka jingphai khmat ka sorkar bad ryngkatka jingiatrei lang u MLA la sdang ba siang rong shaid shaid ban pynsuk ia ki paidbah nongleit nongwan.

Kane ka jingleit jurip u MLA ka Nongpoh ka dei ruh shi bynta ban ioh jingtip kham bha halor ka jingpyntreikam ia kane ka surok kaba ki paidbah ki la angnud la slem ban ioh noh da ka surok rong kaba paka bad kum u MLA ruh u la pynpaw ia ka jingkmen ba ki kam ki la iaid shaid kaba long hi ka jingmyntoi lada lah ban pyndep ia kane ka surok kham kloi.

Haba kren ruh ha kane ka sngi, u Bah Mayralborn Syiem u la pynpaw ka jingkmen kaba khraw ba ki la ïoh ban sdang ban siang rong noh ïa ka surok kaba la sdang na Lad Iewmawlong ter ter haduh ha Ka Shnong Marngar bad ha kajuh ka por u la ai khublei kyrpang ïa ka tnad PWD bad kumjuh ïa u myntri ba khmih ia ka tnad PWD u Bah Prestone Tynsong, kiba ka shim khia na ka bynta kane ka surok kaba la tip kum ka surok Nongpoh, Umden, Sonapur (NUS Road).