Nongpoh, Nohprah 04: Namar ka jingsuki palat ka jingpyntrei ia ka Madan Artificial Turf ne ka madan siang da ki phlang plastik ha shnong Nongsder, u Damanbait Lamare, MLA Umroi, mynta ka sngi, u la khot ia ki ophisar na ka Directorate of Sports & Youth Affairs, kumjuh ruh ia u Kontraktor uba pyntrei ia katei ka madan ba un pynshai sha ki briew ha katei ka shnong, ia ka daw jong ka jingsuki ban pyntrei ia katei ka madan, kaba la dep ban buh Mawnongrim ha u bnai Jymmang mynta u snem.

Ka nongrim kaba la pynlong ia u MLA ba un hap ban khot ia ki ophisar bad kumjuh ia u Kontraktor, na bynta ban pynshai ia ki daw jong ka jingslem ban pyntrei ia katei ka Madan Artificial Turf, ka dei hadien ba ki nongialam ka Nongsder Sports Club lem bad ki nongialam shnong, ki la pyntip sha u Nongmihkhmat, ban pynpaw ia ka jingsngewkhia halor ka jingsuki ka jingpyntrei ia katei ka madan.

Kum ban kdew hangne, ba ka jingpynmang na bynta ban shna ia katei ka madan ka la long haduh T.9 klur tam bad kaba hap ban shna janai katkum ka juk, kata ban don naduh ki jaka khreh kiba paka bad kiwei kiwei ki jingdonkam, ha kaba ka por ba dei ban pyndep ia katei ka madan kan dei hapoh 24 bnai.

Shwa ban leit jurip ia katei ka madan, la don shwa ka jingialang kaba shipor, kaba la donlang naduh u MLA, nangta u Bah Jonas Lyndem, Rangbah Shnong, u Bah Haris Wahlang, President ka Nongsder Sports Club, ki briew ka tnat Sports lem bad u Kontraktor.

Lyngba katei ka jingialang, ki briew na ka shnong Nongsder, ki pynpaw ba ha kaba nyngkong ki kmen ba ki ioh ia katei ka madan, hynrei haba ki iohi ia ka jingsuki haba pyntrei, ka pynsngewsih eh ia ki bad khamtam haba ki iohi bad lap ba ki samla na ka shnong kim ioh shuh ban pyndonkam ia katei ka madan, watla ka jingpyntrei kam pat sdang bha.

Katba na ka liang u Damanbait Lamare, u la kyntu ia u Kontraktor ba u dei ban pynstet noh ka jingpyntrei bad ban pyndep kumba ka dei ban dep, khnang ba kan long ka jingmyntoi na bynta ki khun samla kiba don hapoh katei ka shnong.