Nongpoh, Nohprah 04: Ha ka jingleit jurip kaba mynta ka sngi, la lap ba ka jingkieng ba dang shna thymmai ha Umiam ka la dep, kaba sah mynta ka long satang ban niad rong bad ban pynitynnad, nalorkata sa tang ban siangrong ia ki bynta ka surok ban iaid lyngba katei ka jingkieng.

Ha katei ka sngi ba la leit ban jurip ia katei ka jingkieng bad ia ka surok, la ialam da u Damanbait Lamare, MLA Umroi ha ryngkat ka jingdon u Bah D. Laloo, Executive Engineer ka PWD Umsning Division lem bad kiwei ki ophisar na ka tnat PWD.

Kum ban shu kdew hangne, ba na bynta ban shna ia katei ka jingkieng bad kumjuh ruh ia ka surok, la pynmang haduh T. 23 klur tam, ha kaba ka por ba pyndep ka dei ban long hadpoh 24 bnai, hynrei lyngba katei ka jingjurip ka la pynkmen eh ia u MLA bad kumjuh ruh ia ki ophisar ka tnat PWD, kata ka dei hadien ba ki la iohi bad lap ba tang hapoh ki 7 bnai, la lap ba katei ka jingtrei ka la jan poi sha kaba dep noh.

Haba iadei bad katei ka jingleit jurip ia katei ka Jingkieng kumjuh ia ka surok, u Damanbait Lamare, u la kmen eh bad ai jingiaroh ia u Kontraktor, namar ba u lah ban pyntrei stet ia ka kam, khamtam eh ba katei ka jingkieng ka donkam kyrkieh ban dep kloi noh.

U la ong ruh, ba ynda la plie ia katei ka jingkieng, ka pynsuk ia ki kali heh ban iaid bad kumba ka long mynta, ki kali heh kim lah ban iaid lyngba ka jingkieng heh ha Umiam, namarkata ynda la dep katei ka jingkieng, ki kali heh bad khamtam ki Night Super kin ioh ban iaid lyngba bad ha kata ka por ba ka ISBT ha Mawiong ruh kan sa ioh ban treikam bha.