Shillong, Nohprah 05: Ka tnat Legal Metrology ka Sorkar Meghalaya hynne ka sngi kala shong jingïalang ban bishar kam bad haka jingïalang kala rai ban iaid shakhmat ban pyntreikam iaka Legal Metrology Act 2009.

Haba kren shaki lad pathai khubor u Myntri ka tnat Legal Metrology u Sanbor Shullai u la pynbna ba u la ai por ïa ka tnat 60 sngi ban pyni ïa ka jingpyntreikam ba shisha kata ban jurip iaki dukan bapher bapher ban pynthikna ba kam don ka jingpynkheiñ aiñ ha ki jingthew jingkhia iaki mar mata ha kylleng ka Jylla Meghalaya.

U Bah Sanbor u la ong ba ka long kaei kaei kaba sngewsih ban tip ba, wat hapdeng ki jingbym iaid beit iaid ryntih ha ki rukom thew iaki mar mata haki iew ki hat, kynthup ki Petrol Pump, ki Weigh Bridge, ka tnat Legal Metrology naduh 1972 kam pat ju pynshitom iaki ba pynkheiñ iaka ain Legal Metrology Act 2009.

U la ïathuh ba haduh mynta ka tnat Legal Metrology jong ka Sorkar Jylla ka treikam tang 13 ngut ki Inspector ha baroh kawei ka Jylla Meghalaya.

“Ka jingduna ki Inspector kala ktah bad pynthut ïa ka jingpyntreikam ïa ka aiñ Legal Metrology Act 2009 bad nga la bthah ïa ki Ophisar ban pynkhreh mardor ïa ki jingtyrwa ban thung kham bun ki Inspector ha baroh ki District ka Jylla” la ong u Bah Sanbor.

Naka liang ka Additional Secretary ka tnat Legal Metrology ka Kong Aldealyne Nikhla ka la pynpaw ba ka jingduna ki Inspector ka long kaei kaei kaba pynshitom iaka tnat ban treikam naka bynta ka jingmyntoi ki paidbah nong shong shnong.

“Tang 1 u Inspector um lah ban peit bad pyntreikam iaka ain Legal Metrology Act 2009 ha ka District baroh kawei namar teng teng ki Inspector ki shah bhah kam kum haka kam ilekshon, haki kam VIP, ki jingïalang bad kiwei kiwei bad kane ka khanglad noh iaki ban leit jurip iaki dukan bapher bapher” la ong ka Kong Aldealyne.