Nongpoh, Nohprah 05: Ka Tamasa Amur Falcon ba ar-sngi, ia kaba la pynlong da ka Brup Hang Lang Tourism Promoting Society ha ryngkat ka jingiatrei lang bad ka 7 Huts Production, ka la sdang noh mynta ka sngi hapoh ka shnong Umtngam, ka shnong kaba hap ha Mawhati Constituency.

Ka nongrim kaba la pynlong ia ki nongialam ka Brup Hang Lang Tourism Promoting Society ban pynlong ia katei ka Tamasa, ka long ban pynpaw nam ia ka thain Tyrso bad Umtngam ba kan long kum kawei na ki jngohkai pyrthei bad khamtam na ka jingwan dem ki sim Kbeit Amur Falcon ha katei ka jaka, ha kaba manla u snem ki ju wan ha ki lak tylli.

La plie ia katei ka Tamasa Amur Falcon, da u Dr. Celestine Lyngdoh, Chief Whip ka sorkar jylla kum u Kongsan, ha ryngkat ka jingdon u Bah Charles Marngar, MLA Mawhati, u Abhilash Baranwal, Deputy Commissioner ka Ri Bhoi, ki nongialam shnong ka Shnat Raid Tyrso lem bad kiwei.

Ha katei ka Tamasa ba ar sngi, la sdang da ka jingialang ban ai jingpynshai sha ki paidbah halor ka jingdonkam ban pynneh pynsah bad sumar bha ia ka mei Mariang, ia kaba la ai jingpynshai da ki briew ka tnat Wildlife bad tnat Forest, hadien kata sa ka jingialang ban pynbna plie paidbah ia katei ka Tamasa bad bud sa ka jingiakop iaput iatem.

Lashai ka sngi, kaba dei ka sngi ban pynkut ia katei ka Tamasa, yn sdang shwa da ka jingiakop mareh Marathoh, ka jingïakop niah Cycle bad kin don ruh ki Band ba paw bad kynthup ki local Band bad ki DJ ki ban pynshongshit ha kane ka tamsa, ha kaba kin don ruh ki khusnam pisa naka bynta kito ki nongjop.