Nongpoh, Naiwieng 05: U Bah Charles Marngar, MLA Mawhati, u la pynpaw ba kum u nongmihkhmat ka thain, u don ka jingangnud kaba khraw eh ban pynkylla ia ka Wah Umiam ba kan long kum kawei na ki jaka jngohkai pyrthei kaba paw bad ka ban khring ia shibun ki nongjngoh pyrthei ba kin leit sha katei ka jaka.

Kitei ki kyntien jong ka jingangnud u MLA Mawhati, ka la paw pyrthei mynta ka sngi, kata hadien ba la dep ban plie paidbah ia ka Tamasa Amur Falcon ha Umtnam, ha kaba tang mar ia dep ban plie ia katei ka Tamasa, u Bah Charles Marngar, ha ryngkat ka jingdon u Dr. Clestine Lyngdoh lem bad u Abhilash Baranwal, ki la leit ban jurip ia ka Wah Umiam, kaba dei ka jaka kaba itynnad bad kaba don jingkyrmen ban long kum kata ka jaka jngohkai pyrthei kaba biang eh bad ka ban khring ia kiba bun.

Haba kren hadien katei ka jingleit jurip, u Bah Charles Marngar, u la ong ba u angnud eh ban pynlong ia ki katto katne ki bynta ka Wah Umiam ban pynlong kum ka Fish Sanctuary bad nalorkata ban pynlong ruh kum ka jaka ban kienglieng.

Shuh shuh, u la ong ruh, ba ki don shibun ki jaka ha ki shnong bapher bapher ha Mawhati Constituency, kiba don ia ki jaka jngohkai pyrthei kiba biang eh bad nalorkata ki don ruh ia kata ka jingiathuh khana pateng, kumta halor kata ka nongrim nga kwah bha ban kyntiew ia ka thain Mawhati Constituency ba kan kiew ha ki kam jngohkai pyrthei, khnang ba kan long ruh kum kawei ki lad ban aikam aijam ia ki khun samla bad ia ki briew shnong.