Nongpoh, Nohprah 07: Ka BJP Jirang Mandal ym tang ba ka la sdang ban ialap sha ki paidbah halor ki jingdonkam jong ki kam pynroi bapher bapher ha ka jingialam ka BJP party kum ka sorkar ha ka sorkar pdeng, hynrei shi bynta ban pynkhlaiñ ia ka party na ka bynta ka election 2028 ha ka jylla ka la sdang ba pynkhlaiñ ia ka jingtreikam da kaba lum ba lang ia ki nongialam bad kumjuh ruh ia kiwei kiba thmu ban pyniasoh sha ka party BJP.
Ha ka jingialam u President ka BJP Jirang Mandal u Bah Albertus Lapang ha ka sngi Saitjaiñ ki la pynlong ia ka jingialang ha ka Dorbar Hall ka Shnong Harlibagan ha ka thaiñ Byrnihat na ka bynta ban ia kren ia ki kam jong ka party bad ruh ban dang pynkhlaiñ ia ka party na ka bynta ka election 2028 na Jirang Constituency.
Ha kane ka jingialang la wan ban shim bynta ruh u State Vice President u Bah Khrawboklang Basaiamoit, ka Kong Delina Nonglait kaba in-charge ia ka Ri Bhoi, u Bah Hemanta Timung State President ka ST Morcha, u Bah Sen Thabah District President lem bad kiwei ki nongialam ka BJP Party.
Kiwei kiwei kiba la ia don lang ha kane ka jingialang ka party ki kynthup ruh ki nongialam na ka Congress bad na ka NPP kiba la thmu ban wan pyniasoh sha ka party BJP kiba kynthup ia u Bah Opos Lapang , u Bah Romes Syngkli, u Bah Rison Pohshna lem bad kiwei kiwei.
Haba ai jingkren ha kane ka sngi naduh u President ka BJP Jirang Mandal, u Bah Himanta Timung lemn bad kitei kiwei kiwei ki nongialam ki la ka kren sani bha halor ki kam pynroi ba la wan rah da ka sorkar BJP bad ki la pynpaw ruh da kaba ong ba lada ki paidbah ka Jirang Constituency bad ka jylla Meghalaya ki kwah ban wan ki kam pynroi ki dei ban kyrshan ia ka BJP ha ka election 2028 ha ka jylla.
Ki la bynrap ruh da kaba ong dei tang lada ki paidbah ki pynkupbor ia ka Party BJP ha ka jylla ba kan ioh bat ia u lakam synshar, ki kam pynroi ki dang wan tuid sha kane ka jylla, lada ha ka BJP ka ioh ban synshar ha ka jylla bad ruh ha ka sorkar kmie.
Kiwei kiwei ki bynta ba ki la ia kren ki kynthup ban dang pynkhlaiñ ia ka party BJP ha Jirang Constituency bad ki la pynpaw ruh bun ki nongialam na ka Congress bad na ka NPP kin sa wan ban pyniasoh sha ka BJP bad shen kin sa pynbna ia ka jingwan iasoh sha ka party BJP ba ka thong ka long ban pynkhlaiñ ia ka party ba kan jop ha ka election 2028 na Jirang Constituency.