Nongpoh, Jymmang 31: U Myntri sorkar pdeng ba dei peit ïaka tnad Labour and Employment bad kumjuh ruh ïaka tnad Youth Affairs and Sports u Dr Mansuk Mandaviya mynta ka sngi u Blei u la wan ban iuhkjat ha Ri-Bhoi District na ka bynta ban buddien halor ki jingpyntreikam ïa ki kam pynroi ha kane ka District kaba la shah jied kum kawei na ka ‘Aspirational District’ hapoh ka ri.
Ha kane ka jingwan iuh kjat une u myntri khynnah ka sorkar pdeng ïa ka Ri Bhoi District, la pynlong ïa ka jingïakynduh lang bad ki ophisar ka tnad sorkar bapher bapher na Ri Bhoi ha Conference Hall jong ka District Rural Development Agency, ha kaba naka liang u Deputy Commissioner ka Ri Bhoi u Abhishek Saini u la ai ka jingbatai (Presentation) halor ki jingpyntreikam ïa ki skhim pynroi bapher bapher kiba kynthup ïaka tnad pule puthi, ka rep ka riang, ka koit ka khiah bad kiwei kiwei.
Ha kane ka sngi la sakhi ruh da ka jingdonlang u Bah Mayral Born Syiem MLA ka Nongpoh, u Abhishek Saini Deputy Commisisoner ka Ri-Bhoi, ki heh ophisar ka district bad kiwei kiwei.
Naka liang utei u myntri u la kyntaid ban kren bad ki lad pathai khubor ha kaba ïadei bad kane ka jingïalang, hynrei la pynshai pat da u MLA ka Nongpoh ba kane ka jingïalang ka long ban buddien ïaki skhim jong ka sorkar pdeng kiba la pyntrei ha Ri-Bhoi District khamtam haki tnad sorkar ba kongsan kumno ban pynthikna ba ka pisa bad ki skhim bala ai da ka sorkar pdeng dei ban pyntreikam hok ïaki khnang ba ka jingïarap bad ka jingmyntoi kan poi sha ki nongshong shnong
Sa Peit Ruh
