Nongpoh, Jylliew 03: Ka Mahatma Gandhi University, kaba don ha 13th Mile, Tamulikuchi, Ri-Bhoi District, ryngkat ka jingïatreilang bad ka Blood Center Nongpoh Civil Hospital bad ka Meghalaya State Blood Transfusion Council, ka la pynlong ïa ka Free Medical Health Campaign ha ka sngi ba la dep, bad mynta ka sngi pat ka la pynlong ïa ka Voluntary Blood Donation Camp ha katei ka skulbah.
Ha kane ka prokram kaba la neh ar sngi, la sakhi da ka jingwan ïashim bynta jong u Officer In-Charge ka Byrnihat Police Station, u Rubul Ali, u Rangbah Shnong ka 13th Mile Tamulikuchi, Dr. P. Tariang, In-Charge ka Blood Center Nongpoh Civil Hospital, Dr. Sagar O. Manjare, Honorable Vice Chancellor ka Mahatma Gandhi University, Prof. Champa Boromon, Registrar In-Charge, Dr. Geetaswari Moirangthem, Principal jong ka Nursing Department, lem bad ki samla pule jong katei ka skulbah.
Ka jingthmu jong kane ka prokram kaba ar sngi ka long ban ai lad ïa ki paidbah jong katei ka thaiñ ba kin ïoh ïa ka jingsumar bad jingkhmieh bniah ha ka liang ka koit ka khiah khlem kano kano ka jingsiew. Lyngba kane ka Health Camp, ki paidbah bad ki khynnah skul ki la ïoh ban phah leit peit bniah ïa ka koit ka khiah jong ki halor ki jingpang bapher bapher da ki doktor kiba tbit.
Shuh shuh, lyngba ka Voluntary Blood Donation Camp, ka Mahatma Gandhi University ka la pyrshang ban pynshlur ïa ki paidbah ban ai sngewbha ïa ka snam jong ki khnang ba yn lah ban pyndonkam ban pynïoh jingïarap ïa kiba donkam kyrkieh ïa ka snam ha ki hospital bapher bapher.
Katkum ka jingïathuh jong ki bor pynïaid, ha kane ka sngi la ïoh ban lum haduh 20 unit ka snam na ki riew shimet kiba la wan shakhmat ban ai sngewbha ïa ka snam jong ki, kaba long ka jingïarap kaba kordor na ka bynta ka jingim jong kiwei pat.
Haba kren Naka liang u Vice Chancellor, ka Principal jong ka Nursing Department bad ki samla pule kiba la pyndep ïaka jingai Sngewbha iaka snam ki la Pynpaw ia ka jingkmen ba ki la ioh ban donbynta ha ka ban ïarap iaka imlang ka sahlang bad ki la kyntu ruh ïa kiwei pat ba kin wan shakhmat ban ia shimbynta ha kane ka kam khnang ba yn lah ban ïarap iaki mynsiem Briew ha kapor ba kyrkieh.
Sa peit ruh
